8-тӥ толсуре Удмурт йӧскалык театрын Вань удмуртъёслэн «Удмурт Кенеш» ассоциацизылы 25 ар тырмонэзлы сӥё-дано ужрад ортчоз.

Ужрадэ Удмуртилэн вань ёросъёсысьтыз, бускель улосъёсысь делегациос вуозы. Огъя 500-лэсь ятыр адями пыриськоз.

Ужрадын сӥлы карозы огазеяськонлэсь ветеранъёссэ но ёзчиоссэ, кудъёсыз бадӟым уж лэсьтӥзы удмурт кылэз дышетон, утён но азинтон, удмурт кыллэсь инлыксэ юнматон, калык кусыпъёсты радъян понна.

Сӥё-дано ужрадэ ӧтемын Удмурт Элькунлэн Тӧроез А.В. Соловьёв, Удмурт Элькунысь Кун Кенешлэн Тӧроез В.П. Невоструев, Удмурт Элькунысь валтӥсь федерал инспектор Д.А. Мусин, Россия Федерацилэн Федерал Собраниезлэн Кун Думаезлэн депутатэз А.Е. Загребин, «Россия Федерациысь финн-угор калыкъёслэн ассоциацизы» мерлыко огазеяськонлэн Кенешезлэн Тӧроез П.Н. Тултаев, Удмурт Элькунысь йӧскалык политикая министр Л.Н. Буранова, Удмурт Элькунысь дышетонъя но тодосъя министр А.А. Шепталин.

Ӟечкыланъёссэс вералозы удмурт мерлыко огазеяськонъёслэн кивалтӥсьёссы, Россия Федерацилэн улосъёсаз улӥсь удмуртъёслэн огазеяськонъёссылэн азьветлӥсьёссы, Удмурт Элькунысь пӧртэм выжы калыкъёслэн мерлыко огазеяськонъёссылэн кивалтӥсьёссы.

Ужрад кутскоз 11.00 часэ.