Элькунамы 10 ар ӵоже удмурт кылэз дышетонъя дун тырытэк курсъёс радъясько. Туэ курсъёс кутскозы 1-тӥ тулыспалэ.

Кылем аре удмурт кылэз дышетон радъяськиз 14 площадкаосын, соос пӧлысь 9-эз – Ижкарын, мукетъёсыз – ёросъёсын: Сьӧлта черкогуртын, Пичи Пурга черкогуртын, Кез каргуртын, Глазкарын но Можгакарын.

Туэ площадкадкаослэн лыдзы кылэз дышетыны мылкыд карисьёслэсь утёз. Курсъёсты Удмурт Элькунысь йӧскалык политикая министерство радъя, соин ик дышетскисьёслы дун тыроно ӧвӧл. Дышетон программа 72 час лыдъямын. Курсъёс йылпумъяськем бере, котькуд дышетскисьлы сертификат сётӥське.

Удмурт кылъя дышетӥсьёслэн «Выжы» ассоциацизылэн кивалтӥсезлэн А.Е. Решетниковалэн верамезя, кылэз дышетыны мылкыд карисьёслэн лыдзы арысь-аре будэ. Кылэз мургес тодон понна, дышетскисьёс пырисько пӧртэм пумо мастер-классъёсы, пумиськонъёсы, удмурт ужрадъёсы.

Занятиослэн валтӥсь меретсы – удмурт кылын вераськыны дышетон. Курсъёс бере дышетскись быгатыны кулэ:

– малпанъёссэ удмурт кылын вераны;

– инъет луись кылъёсты тодыны ;

– диалогъёс кылдытыны, юан пуктыны, валэктон сётыны;

– нимысьтыз вазиськемез валаны;

– котырысь адямиослэсь вераськемзэс валаны;

– лыдӟем текстлэсь вакчияк пуштороссэ вераны.

Занятиос арняяз 2-3 пол дышетскисьлы тупась дыре радъясько.

Курсъёсы «Удмуртлык» огинын гожтӥськыны луэ.

Ватсаса ивортодэт: 68-77-98 – Ложкина Елизавета Владимировна, Удмурт Элькунысь йӧскалык политикая министерствоысь валтӥсь-специалист.