20-тӥ куарусёнэ 18.00 часэ Калыкъёслэн Эшъяськон юртазы удмурт кылэз дышетыны мылкыд карисьёс понна оргсобрание ортчоз, кытын пыр-поч вералозы дышетсконлэн радлыкез сярысь, тодматозы площадкаосын ужась дышетӥсьёсын.

«Анай кылэз дышетӥсьёслэн «Выжы» ассоциацизы» огазеяськон удмурт кылэз дышетыны вань мылкыд карисьёс понна курсъёс трос аръёс ӵоже радъя ини. Огазеяськонлэн кивалтӥсезлэн А.Е. Решетниковалэн ивортэмезъя, пӧртэм аръёсы удмурт кылэз дышетыны мылкыд карисьёс пӧлын Германиысь, Финляндиысь, Польшаысь студентъёс но вал.

Туэ Ижкарын дышетскон 6 площадкаосын радъяськоз: Йӧскалык театр, Удмурт кун университет, Калыкъёслэн Эшъяськон юртсы, Кузебай Герд нимо йӧскалык гимназия, Гуманитарной лицей, Флор Васильев нимо лыдӟетъюрт. Удмурт кылэз дышетозы озьы ик Глаз, Сарапул, Можга, Камбарка каръёсын но куд-ог ёросъёсын. Занятиос 1-тӥ коньывуонэ кутскозы но куинь толэзь кыстӥськозы. Йылпумъясьёслы сертификат сётӥськоз.