21-тӥ тулыспалэ 2017-тӥ аре, Анай кыллэн калыккуспо нуналаз, Удмурт Элькунысь йӧскалык политикая министерстволэн юрттэмез улсын www.tangyra.ru вотэсбамын «Удмурт кыл on-line» курсэ пусйиськон усьтэмын.

Видеокурслэн инъетэз луэ М.А. Самаровалэн но О.Б. Стрелковалэн «Лабыр-лабыр-лабыртом!» удмурт кылэз нырысьсэ дышетыны кутскемъёслы дасям пособизы.

Онлайн курсъёсты нуоз филология тодосъя кандидат Стрелкова Ольга Борисовна, Удмурт кун университетысь Удмурт кылосбуръя, финно-угроведения но журналистикая институтысь огъя но финн-угор кылтодонъя кафедраысь доцент.

Дышетскисьёс понна 20 урок дасямын. Татчы пыртэмын вебинар форматэн дасям лекциос, пӧртэм пумо ужъёс, грамматикая материалъёс, тодон-валанэз эскерись ужъёс, дышетӥсен вераськон-кенешонъёс.

Удмурт кылэз интернет пыр дышетскыны кутскон понна www.tangyra.ru. вотэсбаме вазиськон келяно. Пусйиськем адямилэн электрон почтаяз пароль вуоз. Со луонлык сётэ вебинаре пырыны, материалъёсыны тодматскыны.

«Туннэ нуналъёсы кылъёслэн, кудъёссэ уг луы дышетыны онлайн-курсъёсын но интернет пыр, азьланяз улыны луонлыксы ичи. Удмурт кылъя онлайн-курсъёс кылдытон сярысь кемаласен малпамы вал ини… Кылдытӥсьёс оскытӥзы, 21-тӥ тулыспаллэ, Анай кыллэн калыккуспо нуналаз, курсъёс ужаны кутскозы шуыса», — валэктӥз йӧскалык политикая министр Л.Н. Буранова.

Нырысетӥ урок ортчоз 3-тӥ южтолэзе, кутсконэз 17.00 часэ. Занятие ортчем бере видеокурс www.tangyra.ru. вотэсбаме интыямын луоз. Отысь сое котькуд мылкыд карись учкыны быгатоз. Ӵектосэз йылпумъяса, «Удмурт кылэз дышетӥськомы дорамы» нимо видеокурс дасямын луоз.