Удмурт егитъёслэн «Луонлыкъёс сётонъя «Куара» огин» улосвыл мер огазеяськонзы ялэ, «Вотэс» нимо нырысетӥ IT-класслы егитъёсты люкан кутске шуыса.

Пыриськыны быгатозы 7-11-тӥ классъёсысь нылпиос, кудъёсыз удмурт кылэз тодо но мобильной приложениосты ас анай кылынызы лэсьтыны мылкыд каро. Пиналъёсты дышетоз таӵе программаосты радъясь ӧнерчи, ӵектосэ пыриськисьёс понна со лекциос но практической ужъёс ортчытъялоз.

Пусйымон соиз: та удысын дышетскон нырысьсэ удмурт кылын мыноз. Со бадӟым луонлык сётэ пиналъёслы ас анай кылзэс туала улонлэн куронъёсызлы матэ карыны.

Шудонъёс кылдытонъя семинар – ӵектослэн практика люкетэз. Пыриськисьёсты туркымъёслы люкозы, кивалтӥсьёссы юрттэмъя, соос асьсэлэсь IT-шудонъёссэс кылдытозы. Со ватсэтъёс куинь пумо луозы: школаозь нылпиослы, покчи но шоро-куспо классъёсын дышетскисьёслы.

Ӵектослэн йылпумъянэз – ватсэтъёсты адӟытон, отчы дышетӥсьёсты, визьнодасьёсты, билингв-нылпиосты но соослэсь анай-атайёсэс, озьы ик вань мылкыд карисьёсты ӧтёзы.

Ӵектос Президент грантъёсъя фондлэн юрттэменыз ортчытӥське.