31-тӥ южтолэзе сизьыметӥзэ «Бадӟым Удмурт Диктант» дышетон акция ортчиз.

Удмурт диктантэз радъязы «Мынам Удмуртие» телерадиокомпания, Удмурт кун университетысь удмурт филологияя, финно-угроведения но журналистия институт, Вань удмуртъёслэн «Удмурт кенеш» ассоциацизы но Удмурт Элькунысь йӧскалык политикая министерство. Ужрад удмурт кылъя тодон-валанэз эскерон но шонер гожъяськыны мылкыдэз пуромытон, удмурт кылэн тунысыкъяськытон вылысь ортчытӥське.

Туэ элькунамы диктатн гожтыны нимысьтыз 97 площадкаос дасямын вал, нош элькунмылэн палэназ (Башкортостанын, Татарстанын но Марий Элын) ужазы эшшо 24-ез. Нимысьтыз площадкаосын гожтон дыре ик, диктантэз меӵак эфирын радиоын но лыдӟизы.

Диктантлэн текстэз удмурт калыклэн дано пиезлы, кылбурчилы, тодосчилы но юдытӥсьлы Кузебай Гердлы сӥземын вал, угось солы туэ вордӥськем дырысеныз 120 ар тырмиз. Текстэз дасяз кылосбур тодосъя кандидат А.Г. Шкляев.

Акцилы йылпумъянъёс лэсьтэмын луозы «Мынам удмуртие» телеканаллэн вотэсбамаз 30-тӥ оштолэзе. 80 но солэсь трос балл басьтэмъёслы сертификатъёс сётозы. Соосты 1-тӥ инвожоысен басьтыны луоз таӵе адресъя: Удмурт Элькун, Ижкар к., Орджоникидзе ур., 33а юрт (Удмурт Элькунысь йӧскалык политикая министерство).

Диктанлэсь текстсэ, ӵемгес пумиськись янгышъёслы валэктонъёсты, ужъемышъёсты (результат) шедьтыны луоз ужрадлэн «ВКонтакте» вотэсысь бамаз, озьы ик радъясьёслэн но юрттӥсьёслэн нимлыко вотэсбамъёсазы 30-тӥ оштолэзёзь.

Радиодиктантэ пыриськисьёс ужъёссэс 9-тӥ оштолэзёзь келяно таӵе адресъя: 426069, Удмурт Элькун, Ижкар к., Песочной ур.. 9 (пусъёно «Бадӟым Удмурт Диктант») яке электрон попочтае: diktant2018@mail.ru.