26-тӥ шуркынмонэ Калыкъёслэн Эшъяськон юртазы сӥё-дано ужрад ортчиз – УЭ-ысь Йӧскалык политикая министерство бордын ужась Удмурт кылын нимкылъёсъя но шонер гожъяськонъя элькун ӧрилэн 30 ар тырмон. Ужрадэ 150-лэсь трос адями пыриськиз. Та нуналэ ӧрилэн азьвыл ужам но али ужась ёзчиосыз, тодосчиос, журналистъёс, дышетӥсьёс но дышетскисьёс люкаськизы, соос 30 ар ӵоже ужамзылы йылпумъянъёс лэсьтыны тыршизы. Удмуртиысь Кун Кенешлэн тӧроез бордын Удмурт кылын нимкылъёсъя но шонер гожъяськонъя элькун ӧри кылдытон сярысь пуктэт 1995-тӥ арын 30-тӥ коньывуонэ кутэмын вал.

Кенешонэз УЭ-ысь Йӧскалык политикая министр Эдуард Петров сӥё-дано усьтӥз. Со пусйиз: «Удмурт кыллэн 1994-тӥ арын Кункатэн юнматэм инлыкез ми азьын бадӟым ужпумъёс пуктӥз. 1995-тӥ арын кылдытэм Удмурт кылын нимкылъёсъя но шонер гожъяськонъя элькун ӧри бадӟым вамыш луиз ужпумъёсты улонэ вӧлмытонын. Мед кыл котьку но вераськонъя но азинтонъя кужмо тӥрлык луоз».

Кун Думалэн депутатэз Лариса Буранова ватсаз: «Россия Федерацилэн Кивалтэтэзлэн ужаз туж кулэ луись кат улэ. Со Россия Федерацилэн калыкъёсызлэн кылъёсызъя кат. Та ужкагаз пусйымон луэ соос понна, кудъёсыз удмурт кылэз утён бордын тыршо. Шумпотынмон, Удмурт кылын нимкылъёсъя но шонер гожъяськонъя элькун ӧри ужа шуыса, со возьматэ: удмурт кыл вал но вань улэп маке, кудӥз котькуд нунал азинтӥське. Ваньды азьын йыбырттӥсько. Удмурт кыл азинскыны быгатоз соку гинэ, куке котькуд удмуртлэн сюлмаз вераськыны но вӧлмытыны мылкыдыз улоз. Со валтӥсез».

Удмурт кылын нимкылъёсъя но шонер гожъяськонъя элькун ӧрилэсь ёзчиоссэ данъязы удмурт кылэз утён, азинтон, вӧлмытон удысын бадӟым уж нуэмзы понна.

Кун Думалэн депутатэз Олег Гарин пусйиз: «Мон малпасько, 30 ар талэсь азьло Удмурт кылын нимкылъёсъя но шонер гожъяськонъя элькун ӧриез кылдытон со вал туж шонер ужпум. Али Ижкарын бадӟым уж нуиське удмурт кылэз вӧлмытонын, дуглын интыосты, ужъюртъёсты, урам нимъёсты лыдэ басьтӥськом. Мон оскисько, та ваньмыз кулэ шуыса, малы ке шуоно кылтэк асвалан но, лулчеберет но, сям-йылолъёс но уг луо. Соин ик милям огъя ужпуммы – лэсьтыны ваньзэ тае утён понна. Оскисько, милям ваньмыз пӧрмоз шуыса. Праздникен, эшъёс! Сӥзисько шудбур, тазалык, азинлык!»

Кенешлэн валтӥсь ужрад ужрадэз – «Удмурт кыл — удмурт калыклэн лул-сюлэмыз» («Удмуртский язык — живая душа народа»). Сое радъяз кылосбур тодосъёсъя доктор Наталья Кондратьева. Дышетӥсьёс-тодосчиос Людмила Кириллова, Валентина Ившина, Мира Самарова но Галина Мамонтова докладъёсынызы тодматӥзы.

Со сяна «Удмурт Кенеш» мер огазеяськонлэн тӧроез Андрей Ураськин Трокай Борисов нимо йӧскалык премиен сӥлы кариз.

Ужрад улсын онлайн амалэн ортчись викториналэсь вормисьёссэ шараязы.

Ужрадэ пыриськизы РФ-ысь Кун Думалэн депутатъёсыз Лариса Буранова но Олег Гарин, УЭ-ысь йӧскалык политикая министр Эдуард Петров, «Удмурт Кенеш» мер огазеяськонлэн тӧроез Андрей Ураськин, озьы ик кылосбурчиос-тодосчиос, дышетӥсьёс, пиналъёс, мер удысын ужасьёс.