Та ужъемыж удмурт кылэз дышетӥсьёслы, журналистика но ивортодэтэз вӧлмытон удысын ужасьёслы, гожъясьчиослы, дышетскисьёслы бадӟым юрттэт луоз.

Кыллюкам вылькылъёсын, асэстэмъёсын но мукет кылъёсын узырмиз. Книгае шонер гожъяськонъя но пус пуктылонъя выльдэм правилоос пыртэмын. Тодэ вайытом, берпуметӥ таӵе кыллюкам 2002-тӥ арын потэмын вал, отчы 30 сюрс пала кылъёс пыризы, нош выляз – 55 сюрс пала ини.

Та кыллюкам «Удмурт Элькунысь кун кылъёсты но Удмурт Элькунысь калыкъёслэсь мукет кылъёссэс утён, дышетон но азинтон сярысь» кун программа улсын дасямын. Ньыль ар ӵоже кыллюкам бордын история, кылъя но литературая институтысь, Удмурт кун университетысь ӧнерчиос но нимкылъёсъя но шонер гожъяськонъя элькун ӧри ужазы.

Шонер гожъяськонъя кыллюкамлэн тиражез – кык сюрс экземпляр. Вуоно дыре кыллюкам каръёсысь но ёросъёсысь школаосы, лыдӟетъюртъёсы, «Удмуртия» книгапоттоние вуоз.