Россиысь пӧртэм улосвылъёсысь кылъя азьветлӥсьёс, кудъёсызлэн кыл лулчеберетсы пӧртэмгес луэ, анай кылэз вӧлмытонъя, азинтонъя, утёнъя амалъёсты дышетон понна 25–28-тӥ коньывуонэ Удмурт Элькунэ ветлӥзы.

Казаньысь, Кызылысь, Абаканысь, Оренбургысь, Москваысь но Воронежысь егитъёс Ижкаре, Сарапулэ вуылӥзы, Удмурт Элькунысь Калыкъёслэн эшъяськон юртлэн проектъёсыныз, Кузебай Герд нимо йӧскалык музейысь, Сарапул музей-заповедникысь, «Лудорвай» музей-заповедникысь но Дарали Лелилэн йӧскалык дӥсья музейысьтыз экспозициосын тодматскизы.

Уддяди черкогуртысь удмурт лулчеберетъя центрын блогеръёс сюанэ пыриськизы, озьы ик Лудорвай гуртын шоръёзо школаысь дышетскисьёслэн ӵектосъёсынызы тодматскизы. Удмуртъёсын но бесермянъёсын пумиськонъёс огшоры улон-вылон югдурын ортчылӥзы, озьы вакчи дыр ӵоже эшъяськон кусыпъёсты юнматыны луонлыкъёс кылдӥзы.

«В гостях у носителей языка» медиадышетон блог-тур ӵектос радъяське йӧскалык ужъёсъя Федерал агенстволэн, Удмурт Элькунысь Йӧскалык политикая министерстволэн но кылъя азветлӥсьёслэн выль медиосъя огазеяськонзылэн юрттэмезъя, озьы ик Йӧскалык кусыпъёсъя ресурсной центрен.

Ӵектос Россиысь калыкъёслэсь анай кылзэс утён удысын егитъёслэсь тунсыкъяськонзэс ӝутонлы сӥземын. Таӵе проектъёс егит талантъёслэсь мылкыдзэс бурдъяны кулэ, уго соос калымылэсь вуоно нуналзэ кылдытозы но этнос кусыпъёсты радъялозы. Блог-турлэн кулэлыкез – Россиын улӥсь калыкъёс пӧлын диалогез анай кылын радъян бордын. Ог-огеныд сыӵе кусып возён дыръя выль кабъёс (формаос) шараясько, озьы Россиысь калыкъёслэсь кылъёссэс азинтон удысын выль луонлыкъёс кылдо но уже кутӥсько.

Та дыре йӧскалык ужъёсъя Федерал агенство кылъя азветлӥсьёслэсь но ӵектосэ пырыськисьёслэсь, анай кылэз утён понна дэмланъёссэс но ӵектонъёссэс лыдэ басьтыса, инструкция дася.