20-тӥ оштолэзе Удмурт Элькунысь Кун Кенешын «Удмурт литературалэн XXI дауре азинтӥськон сюресъёсыз: pro et contra» темалы сӥзем котырес ӝӧк ортчиз.

Люкаськонэз радъязы Удмурт Элькунысь Кун Кенешысь йӧскалык политикая, мер кышкыттэмлыкъя, регламентъя но ужез радъянъя ӧрилэн иквалтӥсез Энвиль Касимов но Историяя, кылъя но литературая удмурт институтлэн кивалтӥсез Алексей Загребин. Ужрадэ пырськизы Кун Кенешысь депутатъёс, иворчиос, мерлыко огазеяськонъёслэн ёзчиоссы, тодмо гожъяськисьёс, кылбурчиос, тодосчиос.

Удмурт поэзилэн азинтӥськон сюресъёсыз сярысь вераз Историяя, кылъя но литературая удмурт институтысь тодосчи Алексей Арзамазов. Солэн пусъемезъя, туала гожъяськисьёс ӵемгес гожъяськыны кутскизы кык кылын – удмурт но ӟуч. Валамон, ӟуч кылын гожтэм произведенилэн лыдӟисьёсыз арто, но соин чош ик тазьы гожъяськыса ышыны быгатэ удмурт кыллэн чеберлыкез, фразеологической кылсочетаниос. Алексей Арзамазов пусйиз удмурт кыллэсь чеберлыксэ но узырлыксэ утёнлэсь кулэлыксэ.

Удмурт кун унверситетысь профессор Марина Серова ӟуч но удмурт гожъяськисьёслэн кусыпъёссы сярысь вераз. «Ӟуч кылбурчиос уг тодо удмурт кылбурчиосты, удмурт кылбурчиос уг тодо ӟуч кылбурчиосты». Калыкъёс ог-огенызы тунсыкъяськемысь дугдэмын. Калыкъёсты огазеян бордын мургес ужаны отиз тодосчи.

Удмуртиысь журналистъёслэн огазеяськонзылэн кивалтӥсез Пётр Захаров ӝутиз егит гожъяськисьёс сярысь юанэз. Солэн малпамезъя, литератураез чапак егитъёс кылдыто, сои ник соолы нимысьтыз саклык висъяно.

Энвиль Касимов пусйиз, литература удысын орчись ужрадъёс сярысь иворез калыклы вуттоно шуыса. Озьы ик литератураез, кылэз, лулчеберетэз азинтон понна литераторъёслы стратегия малпано.