18-тӥ южтолэзе Ижкарын Удмурт лулчеберетлы сӥзем фестивалез нимлыко усьтон радъяськоз. Фестиваль кык арлы одӥг пол орче. Туэ со радъяськоз куинетӥзэ.

Концертын возьматэмын луозы вашкала но туалы кырӟанъёс, калык эктонъёс но сям-йылолъёс. Удмуртиысь тужгес но зол коллективъёс возьматозы асьсэлэсь программазэс: кырӟанъя но эктонъя «Марӟан» ансамбль, «Вить кырӟась сюлэмъёс» воргорон ансамбль, «Вуюись» калык ансамбль, «Ерпечкаос» калык ансамбль, кырӟанъя но эктонъя «Италмас» академической ансамбль. Фестивальлэн куноосыз – Башкириысь “Сузэръёс” фольклор дуэт. Фестивалез усьтон концерт кутскон сётоз поӧртэм пуштросо но формаё ужрадъёслы, кудъёсыз радъяськозы элькунмылэн ёросъёсаз но каръёсаз быдэс ар ӵоже.