25-26-тӥ шуркынмонэ Свердловск улосын удмурт лулчеберетлы сӥзем нуналъёс радъяськозы.

Ужрадлэн валтӥсь ужпумъёсыз – удмурт калыклэсь кылзэ, лулчеберетсэ, сям-йылолъёссэ утён но азинтон, егитъёслы удмут шӧм пыӵатон, Удмурт Элькунлэсь Россия Федерацилэн улосэныз матысь кусыпъёс радъян.

25-тӥ шуркынмонэ Верхняя Пышма карын “Удмурт кылэз но йӧскалык дышетонэз азинтон” темалы сӥзем котырес ӝӧк радъяськоз. Та юанэз сэрттозы-пертчозы Свердловск улосысь удмуртъёслэн “Эгес” мерлыко огазеяськонзылэн, удмурт лулчеберетъя “Урал Кенеш” центрлэн азьветлӥсьёссы но ёзчиоссы, карысь 25-тӥ номеро школысь дышетскисьёс но дышетӥсьёс. 26-тӥ шуркынмонэ таӵе ик ужрад Екатеринбургын радъяны чакламын. Та нуналэ Калык быгатонлыкъёсъя Свердловск улосысь кун дворецын «Уральская финно-угория-2016» нимо финн-угор калыкъёслэн лулчеберетсылы сӥзем VIII улосвыл фестивальзы радъяськоз.