Огазеяськонлэн председателезлэн – Елена Васильевна Миннигараевалэн – берло 4 ар ӵоже ужамезлы дунъет сётӥзы.

Конференцие пыриськизы огазеяськонлэн председателез, элькунысь вань ёросъёсысь но каръёсысь нылкышноос, Башкортостанысь удмурт кышномуртъёс. Со сяна ӧтем куноос, кудъёсыз пӧлын УЭ-ысь йӧскалык политикая министр Эдуард Петров но вал:

«Та дыр куспын трос ӵектосъёс улонэ вӧлмытэмын, кудъёсыз семья дунлыкъёты утёнлы но пичиос но егитъёс пӧлын удмурт кылэз азинтонлы сӥземын: «Пичи Чеберайёс но Батыръёс» («Маленькие красавицы и богатыри») фестиваль-вожвылъяськон, тодослыко-практической конференциос, нырысетӥ удмурт нылкышно кылбурчилы но ожгар эмчилы Ашальчи Окилы сӥзем мурал, кудӥз карын одӥгаз трос этажъем коркан суредамын, «ДОР» мерлыко-югдытӥсь марафон, со герӟаз 1500-лэсь трос адямиез 23 гуртъёсысь но черкогуртъёсысь 2022-тӥ арын Удмурт Элькунысь Александр Бречалов Тӧролэн «Признание» премиеныз», — пусйиз министр.

«Удмурт нылкышно кенеш»-лэн но «Удмрут кенеш»-лэн кусыпъёссы – со огкылысь ужанлэн адӟем карымон эталонэз. Соос ӵош удмурт калыклэсь лулчеберетсэ, кылзэ но сям-йылолъёссэ утёнын но азинтонын тыршо. Ужало ӵош но огкылысь.

Сюлмысь ӟечкыласькомы! Азьлань гинэ!