2022-тӥ ар понна йылпумъянъёс лэсьтыку, «Признание» премиез Ижкарысь 18 улӥсьёс басьтӥзы. Соос пӧлын «Удмурт нылкышно кенеш» улосвыл мерлык движение, кудӥныз кивалтэ Елена Миннигараева.

Ог 30 ар ӵоже огазеяськонлэн валтӥсь ужпумез – удмурт нылкышноослэсь мерлыко инлыксэс, лулчебертлы но анай кыллы тунсыкез ӝутон. Движение пыриськисьёс радъяло семьялы но нылпиослы сӥзем пӧртэм ужрадъёсты.

«Тужгес ик милям огазеяськонмы семья пушкын анай кыллэсь кулэлыксэ утьыны тырше. Соос пӧлын – вордӥськем шаерзэс, кылзэс яратӥсь удмурт нылкышноос, кудъёсыз вань удмуртлыксэс нылпиоссылы пыӵато. Милям туж трос ӵектосъёсмы, соос сӥземын нылкышноослы. Озьы ик егитъёсты но пӧртэм ужрадъёсы кыскыны тыршиськом», – вераз Елена Миннигараева.

Али гинэ йылпумъяськиз огазеяськонлэн тужгес но бадӟым ужрадэз – «Пичи чеберайёс но батыръёс» вожвылъяськон. Со сӥземын Россиысь калыкъёслэн лулчеберет кылёссылы. Ужрадэ пыриськизы Удмурт Элькунысь но Татарстан, Башкортостан, Пермь улосвылъёсын улӥсь удмуртъёс.

«Вуоно аре эшшо но тросгес ӵектосъёс радъяны малпаськом. Куд-огъёсыз сям-йылол выллем луизы ни, но выль малпанъёс но вань на. «Признание» премия бадӟым юрттэт луэ, кудӥз луонлык сётоз ӧжытак тросгес лэсьтыны», – йылтӥз на председатель.

Огазеяськонлэн басьтэм сертификатэз луоз бадӟым юрттэт «Дор» югдытӥсь марафонэз радъян удысын. Та ужрад сӥземын луоз «Удмурт нылкышно кенеш»-лэн 30 ар тырмонэзлы но удмурт кылбурчилэн Ашальчи Окилэн 125 арес тырмонэзлы.

Тодэ вайытӥськом, 2022-тӥ арын «Признание» премиез сётон куатетӥ ползэ ортчиз. Ӵектослэн кичӧлтӥсез луэ Удмурт Элькунлэн Тӧроез Александр Бречалов. Сӥё-дано ужрадын Александр Владимирович быдэстэм ужъёс понна вань пыриськисьёслы тау кылъёс вераз.