Таяз арняе «Немцы Урала: историко-культурное наследие и современность» нимо нырысетӥ конференцилэн ужрадъёсыз ортчизы, сӥземын со улосвылысьтымы егитъёслэн эскерон (исследовательской) ужъёссылы.

Конференция 25-тӥ шуркынмонэ УЭ-ысь Йӧскалык музейын, «Немецкие истории на берегах Ижа» нимо адӟытонын ортчиз. Отчы пыриськизы кылтодонъя 22-тӥ номеро лицейысь но мукет школаосысь дышетскисьёс.

Онлайн амалэн пыриськисьёслы ӟечкылан кылэн вазиськизы Олег Штралер, политика тодосъёсъя кандидат, немецъёслэн лулчеберетсыя калыккуспо союзлэн Председателезлэн воштӥсез но Дмитрий Вайман, истори тодосъёсъя кандидат, Пермысь гуманитар эскеронъёсъя институтысь тодосчи.

Конференциын вормисе потӥзы:

Виктория Ахметшина («30-летие немецкого движения в Удмуртии»);

Абрамова Анна («История моей семьи. Фамилия Динер»);

Иванова Анастасия но Гильметдинова Лия («Репрессированные немцы и репатрианты в Удмуртии»).

Нимысьтыз кузьымен дунъясьёс пусйизы Иван Морозовез («Роль немцев-инженеров в налаживании мотопроизводства в Ижевске»).

Пыриськемзы понна дипломъёс басьтӥзы:

Нуруллин Эльмир («Мои родственники – российские немцы в период Великой Отечественной войны (1941-1945)»;

Наймушин Савватий, Умарова Софья («Яркие представители немцев в Удмуртии в XX в.»);

Догадкин Никита («Немецкие мастеровые на Ижевском заводе»).

26-27-тӥ шуркынмонэ конференция «Дзержинец» нимо лагерьын ужзэ азьланьтӥз. Отчы пыриськизы кылтодонъя 22-тӥ лицейлэн 8-11-тӥ классъёсысьтыз дышетскисьёс но мукет школаосысь немец лулчеберетэн тунсыкъяськись нылпиос.

Пиналъёс Гримм агайёс нимо «выжыкыл урамтӥ» ветлӥзы, дышетӥзы немец (мукет калыкъёслэсь но) эктонъёсты но кырӟанъёсты, тодматскизы Россиысь немецъёслэн улон сюресэнызы, пуктӥзы тунсыко номеръёс, анайёслы чебер открыткаос лэсьтӥзы, нырысетӥ Адвентэз пусйизы но егитъёслэн «Югендхайм» нимо движениысьтызы куноосты шуныт пумитазы.