Та фестиваль Удмуртилэн шоркараз ньылетӥ ползэ люказ ни авторъёсты но усточиосты, кудъёсыз тунсыко жанръёс пыр калыкъёссылэсь лулчебертсэс но сям-йылолъёссэс азинто. Ужрад 2-тӥ толсуре туала этнодизайнеръёслэсь коллекцизэс адӟытонэн кутскиз (0+). Фестивальлэн валтӥсь ужрадэзлы пӧрмиз странамылэн пӧртэм улосвылъёсысьтыз этногруппаослэн бадӟым концертсы (16+). 4-6-тӥ толсуре «Тангыра»- лэн куноосыз Россиысь калыкъёслэн кылъёсынызы пуктэм киноосты учкизы (12+).

Этномодая адӟытон ортчиз Калыкъёслэн эшъяськон юртазы. Асьсэлэсь коллекциоссэс Удмурт шаерысь но Марий Эл Элькунысь усточиос возьматӥзы.

100-лэсь трос пӧртэм дӥсьёсты адӟытӥз Удмурт Элькунысь «Асылъяр» ансамбль. «Айшет дыр» нимо нырысетӥ коллекциеныз тодматӥз Алевтина Семенова. Евгения Кошкина, Марий Элысь дизайнер, йӧскалык пужыосын керттэм шуныт кофтаос но шарфъёс адӟытӥз.

3-тӥ толсур странамылэн пӧртэм улосвылъёсысьтыз крезьгурез яратӥсьёсты, этногруппаосты бадӟым концертэ люказ. Нырысетӥ ползэ возьматӥз ассэ «Тангыра» сцена вылын Москваысь «Калевала» группа – Россилэн фолк-метал-сценаысьтыз тужгес но тодмо коллектив. Озьы ик асьсэлэсь кырӟанъёсэсс кырӟазы boblenin, «КузмиЧ», Unrill, PopCorn, «ЯлАр» но трос мукет туркымъёс.

4-6-тӥ толсуре «Империя Грёз» кинотеатрын Россиысь калыкъёслэн кылынызы пуктэм фильмъёс мынӥзы. Удмурт шаере вуылӥзы ас ужъёсынызы сыӵе режиссеръёс, кудъёсыз Европаысь бадӟым кинофестивальёсы но вожвылъяськонъёсы пыриськылӥзы ни.