3-8-тӥ шуркынмонэ «Большой этнографический диктант» калыккуспо югдытон акция сизьыметӥ ползэ ортчиз. Площадкаосын но онлайн амалэн www.miretno.ru. вотэсбамын та ужрадэ пыриськыны вань мылкыд карисьёс быгатӥзы.

Удмурт Элькунын туэ 160 площадка усьтӥськемын вал, валтӥсез соос пӧлын Ижкарысь Калыкъёслэн Эшъяськон юртсы, отчы диктантэз гожтон понна 150 мурт вуиз. Соос пӧлын – йӧскалык-лулчеберет огазеяськонъёсысь кивалтӥсьёс, Россиысь Кун Думаысь но Удмурт Элькунлэн Кун Кенешысьтыз депутатъёс, вылӥ дышетскон ужъюртъёсысь студентъёс но кадетъёс.

Тросэз площадкаос радъямын вал лыдӟетъюртъёсын, культура юртъёсын но дышетскон ужъюртъёсын. Оглом Удмуртиын оффлайн площадкаосы 3 371 мурт пыриськиз. Гожъясьёслэсь лыдзэс чаклано ке, нырысьёсыз пӧлын Ижкар, Можга, Якшур-Бӧдья, Шаркан но Балезино ёросъёс луо.

Диктант гожтӥсьёслэн шор арлыдзы – 36, соос пӧлын тужгес но бадӟымезлы – 89, покчиезлы – 6 арес. Элькунъя диктант гожтэм понна шорлыдын 64 балл басьтӥзы. Онлайн амалэн 37 739 адями пыриськиз.

Оглом Удмурт Элькунын 41 110 адями диктантэз гожтӥз. Тодэ вайытом, 2021-тӥ арын 29 601 пыриськисьёс лыдъямын вал.

Удмурт Элькунысь Йӧскалык политикая министр Эдуард Степанов озьы ик пусъе пыриськисьёслэсь Бадӟым этнографический диктантэн тунсыкъяськемзэс: «Та акция дырыз дыръя кылдӥз но туж аспӧртэмлыко луиз. Котькуд мылкыд карись шаерысьтымы пӧртэм калыкъёс но соослэн сям-йылолъёссы сярысь трос выльзэ но тунсыкозэ тодыны, аслэсьтыз этнографияя тодон-валанъёссэ эскерыны быгатэ. Шумпотымон, арысь аре асьмеос вылэгес ӝутскиськом, угось Удмуртиын «вордӥськем» югдытон акция 184 шаеръёсын тодмо ни».