13-17-тӥ коньывуон толэзе «Дзержинец» шутэтскон интыын 14-17 аресъем егитъёслы йӧскалыккуспо лагерь смена ортчоз. Ужрадэз арлы быдэ Удмурт Элькунысь егитъёслэн мерлыко огазеяськонъёссылэн «Вместе» ассоциацизы радъя.

Туэ лагерь смена Егитъёслэн но студентъёслэн дунневыл фестивальзылэн элькун программаезлэн люкетэз луоз. Россиын улӥсь калыкъёслэн историенызы но лулчеберетэнызы тодматскон вылысь, лагере пӧртэм кунъёсысь 50 делегатъёс вуозы. «Лагерьын котькуд ужрад йӧскалыккуспо луэ. Нылпиосты ми калыкъёслэн сямъёсынызы тодматӥськомы, кунмурт шӧдонзэс азинтӥськомы, йӧскалыккуспо ужрадъёсы кыскиськомы», – вера Ассоциацилэн кивалтӥсез Мария Царева.

Лагерьлэн программаез радъямын «йӧскалык лулчеберетъёслэн нуналзы» принципъя. Котькуд нунал сӥземын выль калыкен, солэн лылчеберетэныз сям-йылолъёсыныз, улон радэныз но ортчем сюресэныз тодматсконлы. Нуналлы быдэ егитъёслэн вань луонлыксы калыклэн улон атмосфераяз быдэсак выйыны. Улон шоры мукет калыклэн синмыныз учкон одӥг калыклэн мукетызлэсь вылӥынгес луэмез сярысь малпанъёсты палэнтыны юрттэ. Та ик луэ лагерьлэн валтӥсь меретэз.

Пиналъёсты возьмало йӧскалык кусыпъёслы сӥзем котрырес ӝӧкъёс но пумиськонъёс, командаын ужаны быгатонлы но калыкез валаны дышетонлы сӥзем тренингъёс, пӧртэм мастер-классъёс, творческой ужъёс но акциос. Кылсярысь, «ЭТНОэксперт» шудон, «Удмуртиын улӥсь калыкъёслэн осконзы но лулчеберетсы» интерактивной лекция, «Быдэс планетаен ӵошен» нимо квест.

Элькунысьтымы йӧскалыккуспо сменаез «Вместе» Ассоциация дасо аръёс ӵоже радъя ини. Та дыр куспын кӧня ке пол воштӥськиз солэн нимъёсыз: «Вамыштӥськом ӵошен», «Йӧскалыккуспо герӟет», «Лэсьтомы ӵошен». Воштӥськытэк кыле лагерь сменалэн пуштросэз – йӧскалык кусыпъёсты радъян, егитъёсты «бадӟым» улонын тупаса, ог-огдэ валаса улыны дасян, кылкутӥсь кунмурт луыны дышетон.

Ватсаса ивортодэт басьтыны луэ таӵе телефонъя: 63-10-65 – Царева Мария – «Вместе» Ассоциацилэн кивалтӥсез.