26-тӥ коньывуонэ «Дружба» шутэтскон базаын «Удмуртия – асьмелэн огъя дормы» нимо йӧскалыккуспо лагерь смена усьтӥськиз.

Та нуналэ пиналъёсты ӟечкыланы вуизы Удмурт Элькунысь физкультурая, спортъя но егитъёсын ужан политикая министрлэн воштӥсез Максим Сорокин, Удмурт Элькунысь йӧскалык политикая министерствоысь валтӥсь ӧнерчи Екатерина Чуракова, Калыкъёслэн Эшъяськон юртсылэн директорезлэн воштӥсез Раиса Солонинко, быгатонлыкъёсты азинтонъя «Октябрьский» центрлэн кивалтӥсез Наталья Корзникова.

Котькудзы соос пусйизы пӧртэм выжысь калыкъёс куспын эшъяськон мылкыд пыӵатонлэсь, калыкъёслэсь лулчеберетсэс но сям-йылолъёссэс валаны но гажаны дышетонлэсь туннэ нуналлы туж кулэлыко луэмзэ.

Пиналъёс куноосты шумпоттӥзы шулдыр кырӟанъёсынызы но яркыт эктонъёсынызы.

Удмурт Элькунысь егитъёслэн мерлыко огазеяськонъёссылэн «Вместе» ассоциацизылэн кивалтӥсез Мария Царева вераз огазеяськонлэн ӵектосъёсыз сярысь, кудъёсыз сӥземын калыкъёслэсь лулчеберетсэс но кылзэс вӧлмытонлы, калык кусыпъёсты радъянлы. Туннэ нунал понна ассоциацилэн валтӥсь ӵектосэз – егитъёслэн йӧскалыккуспо лагерьзы.

Лагере Ижкарысь но ёросъёсысь 12-16 аресъем пиналъёс вуэмын. Татын соос котькуд нунал тодматскозы выль калыкен, солэн историеныз, сям-йылолъёсыныз. Пиналъёс вуылозы пӧртэм музейёсы но калык лулчеберетъя центръёсы, соос понна дасямын тунсыко котырес ӝӧкъёс, мастер-классъёс, тренингъёс, шудонъёс но акциос.