Кызьы Удмурт Элькунын йӧскалык шулдыръяськонъёс ортчозы Удмуртиысь Кивалтэтын вакчияк пресс-конференциын вераз йӧскалык политикая министр Эдуард Петров.

«2026-тӥ ар кунмылэн Азьмуртэз ялӥз Россиысь калыкъёслэн огъя луэмзылэн ареныз, соин ик таӵе инлык котькуд йӧскалык шулдыръяськонлы нимысьтыз саклык лэсьтэ. Туэ ньыль бадӟым йӧскалык ужрадъёс ортчытэмын луозы, кудъёсыз 30 сюрлэсь трос адямиосты асьме дорын улӥсь калыкъёслэн лулчеберетэнызы, сям-йылолъёсынызы тодматозы», – пусйиз Эдуард Петров.

30-тӥ куартолэзе Каракулино ёросысь Ныргында гуртын «Семык» (0+) элькун шулдыръяськон ортчоз. Шулдыръяськонлэн сӥё-дано усьтонэз 11:00 часын кутскоз. Ужрад 2026-тӥ арлэн, кудзэ Владимир Путин Россиысь калыкъёслэн огъя луэмзылэн ареныз юнматӥз, яркыт ужрадэз луоз. Со сяна, ужрад гожъясьчилэн, дышетӥсьлэн но мерлыко ужасьлэн Илья Токмурзин-Ломберскойлэн котырес лыдпусэзлы сӥземын.

Семык – пор калыклэн вашкала праздникез, кудӥз гужем вуэмен герӟаськемын. Солэн инъетаз – ӵыжы-выжы, гурт возёс но семья кусып обрядъёс луо.

Пужыятэм ӵушкон – шулдыръёськонлэн валтӥсь тодметэз, со куно пумитанлэн но эшлыко луонлэн пусэз луэ, праздникын ӵыжы-выжыос куспын «эшъяськонлэн сюресэз» луоз .

Лыктэм куноосты мур пуштросо программа но мастер-классъёс возьмалозы. Илья Токмурзин-Ломберскойлэн 130 тырмонэзлы сӥзем митинг но «Кечывал кочкыш» сэбед нуназеян бере площадкаос ужаны кутскозы. Адӟытонын ӧнерчиос ужъёссэс возьматозы но мастер-класс ортчытозы. «Йоча модыш вер» нылпиослы, «Мари кучедалмаш» пор нюръяськонъёсты яратӥсьёслы, «Рвезе тукым» егитъёслы площадкаос дасямын луозы. «Эн мотор, да уста марий ӱдыр» (Самая красивая и умелая марийская девушка) вожвылъяськонлы йылпумъянъёс лэсьтэмын луозы, собере йӧскалык дӥсен дефиле. Радъямын луоз «Поян илыш-йула – ик оян калык» (Богатые традиции – единый народ) концерт.

«Көрбан» – УЭ-ысь ичи коренной бесерман калыклэн вашкала сям-йылолэз. «Көрбан» гужем ортчылӥз бусы ужъёс йылпумъяськем бере. Таяз аре шулдыръяськон (0+) 6-тӥ инвожое Яр ёросысь Вортча гурт котырын ортчоз.

«Көрбан» шулдыръяськонын йӧскалык чеберъянъёс кылдытонъя мастер-классъёс, «Аби көл» но «Шөдоннёс» ӝӧквыл шудонъёсын площадкаос,  «Ворча пал» адӟытон но «Берекет» литературной площадка дасямын луозы. Шулдыръяськонэз сӥё-дано усьтэм бере спортъя но кылдытос ужъя вожвылъяськонъёс ортчозы: «Көнаро пиёс» кужымъя но чупырес луэмъя нюръяськон, «Вольная песнь бесермянина» лыдӟисьёслэн вожвылъяськонзы, «Бесермяночка» дизайнеръёслэн адӟытонзы.

«Гербер» (0+) удмурт йӧскалык шулдыръяськон – удмурт калыклэн одӥгез валтӥсь праздникез – туэ ортчоз 20-тӥ инвожое Глаз ёросысь Коӵышгурт вӧзын. Ужрад 2026-тӥ арлэн, кудзэ Владимир Путин Россиысь калыкъёслэн огъя луэмзылэн ареныз юнматӥз, яркыт ужрадэз луоз.

Валтӥсь сценаын йӧскалык но калыккуспо огазеяськонъёс шулдыртозы.

Озьы ик нунал ӵоже ужалозы творчествоя но спортъя пӧртэм площадкаос. Соос пӧлын: «Писпу кужым» егитъёслы этно-марафон, «БОНЪЁС vs. БЕНЪЁС» футбол шудонъя турнир, «Батыр-кужым» ӟигарез эскеронлы сӥзем площадка, лекториосын «Воршуд» площадка, арт-объект лэсьтонъя «Шаплы пила» мастер-класс но трос мукет.

Каръёсысь но ёросьёсысь делегациосты ӧтиськомы пыриськыны «Удмурт музъемез утӥсьёс» пулэсь лэсьтэм скульптураослэсь адӟытонэ. Ваем скульптураос – со Глаз ёрослы кузьым. Скульптураосын адӟытон интыяськоз валтӥсь капка возын. Шулдыръяськон бере соос «ДондыДор» парклы кузьмамын луозы. Скульптураослы куронъёс положениен юнматэмын.

Туэ озьы ик Москваын ВДНХ-ын 4-тӥ пӧсьтолэзе Гербер шулдыръяськон ортчоз.

27-тӥ инвожое Воткакарын «Сабантуй» бигер йӧскалык шулдыръяськон (0+) ортчоз. Ужрадын «Көрәш» йӧскалык нюръяськон, вожвылъяськонъёс, йӧскалык дӥсен адӟытон, сяськаосты мерттон акция, Удмуртиысь, Татарстанысь но Башкортостанысь огазеяськон сцена вылын шулдыртозы. Куноосты вите сиён-юонъёсты веръян, ӧнерчиослэн ужъёсынызы тодматскон, мастер-классъёс но калык шудонъёс. Йӧскалык шулдыръяськон батыръёсты данъетанэн йылпумъяськоз.

Со сяна улонэ вӧлмо быдэс кунын тодмо ӵектосъёс но выль кичӧлтонъёс: «Мир в диалоге» улосвылкуспо тужгес но усто практикаосын форум, «Бадӟым этнографической диктант», туэ кудӥзлы дас ар тырмиз ини, «В единстве наша сила» калыкъёс куспын фестиваль, «Герои народа – герои страны» вожвылъяськон, «Удмурт Элькунысь сизьыметӥ классъёслы эшъяськон урок», этноволонтёръёслэн корпуссы но «БУД» дышетон центр ужало.

Та ужрадъёсы пыриськон лулчеберетэз утёнлы но азинтонлы, дунлыкъёсты вӧлмытонлы юртто, соос «Семья» йӧскалык ӵектослэн азьмугъёсызлы тупало.