9-тӥ гудырикошконэ дунне лулчеберет мерасэз утён понна пусъе туж кулэ луись нуналэз – Коренной калыкъёслэн калыккуспо нуналзы. Валчеяськем нациослэн огазеяськонзы та нуналэз 1994-тӥ аре юнматӥзы.

Удмуртия – яркыт улосвыл, кудаз лулчеберетъя сям-йылолъёс утиськемзы сяна, азинско но. Та уж юнматӥське грант вожвылъясконъёсы пыриськонъёсын но вормонъёсын.

2025-тӥ арын йӧскалык-лулчеьеретъя огазеяськонъёс субсидиос басьтӥзы 8 миллион манетлэсь трос. Соослэн ужрадъёссы сям-йылолъёсты, дунлыкъёсты но мукет кулэ луись ӧръёсты утёнлы, азинтонлы но вӧлмытонлы сӥземын.

Кылсярысь, арлы быдэ элькунамы йӧскалык шулдыръяськонъёс ортчыло, ӵектосъёс улонэ вӧлмо: Ӟуч лулчеберетъя огазеяськонлэн «Высокий берег» (6+), «Поэтическая аллея» (6+), старообрядецъёслэн «Истоки КАкиеМЫ?» (6+), «Удмурт Кенеш» но «Шунды» огазеяськонъёслэн «Корни твои» (12+), егитъёслэн «Тангыра» (6+) фестивальзы, «Быгыртон» (6+) фольклор эктонъя школа, камсьӧр удмуртъёслэн «Древние напевы удмуртов «Чакара» (12+), Пор лулчеберетлэн нуналъёсыз (12+), бесерман огазеяськонъёслэн ӵектосъёссы но мукет.

Егитъёслэн проектъёссы озьы ик юртто Удмуртиын улӥсь калыкъёслэсь лулчеберет узырлыксэз утьыны но азинтыны. Кылсярысь, «Этноволонтеры» ӵектос, «Этноэксперт» элькун визьбуро шудон, «БУД» (6+) дышетонъя центр, «Шундыкар» (12+) но «Тулкым» (12+) лагерь сменаос.

10-тӥ пӧсьтолэзе Удмуртиын «Маршрут построен! Удмуртия многонациональная!» (12+) йӧскалыккуспо блог-тур йылпумъяськиз. Та ӵектосэз Калыкъёслэн Эшъяськон юртсы радъя «Росмолодёжь.Гранты», Лулчеберет кичӧлтонъёсъя Президентлэн фондэз, УЭ-ысь йӧскалык политикая министерство юрттэмен. 8 нунал куспын 11 этноблогеръёс гуртъёсы но черкогуртъёсы вуылӥзы – элькунамы улӥсь калыкъёслэсь лулчеберетэнызы тодматскизы.