«Удмуртия» лыдӟетпоттонни бадӟым уж лэсьтӥз – 1-11-тӥ классъёслы удмурт кылъя но литературая 33 дышетонъя но методикая комплектъёс печатьлы дасяз (нимысьтыз анай кылэз тодӥсьёслы но тодӥсьтэмъёслы). Котькуд комплектэ печатлам но электрон книгаос, озьы ик дышетӥсьлы методикая пособие пыре.

«Асьме лыдӟетпоттоннимы – одӥгез гинэ, кудӥз огъядышетонъя ужъюртъёслы учебникъёс печатла. Соин ми валаськомы, кыӵе кылкутӥськомы, кыӵе азьмугъёс азямы сыло. Печате поттон понна уж кык арлэсь кема мынӥз. 2023-тӥ арын элькун покчи классъёс понна удмурт кылъя но литературая учебникъёс кылдытон бордын ужаз, 2024-тӥ арын – бадӟым классъёслы. Али дырлы вань макетъёс типографиосын поттэмын, выль книгаосты 15-тӥ гудырикошконозь возьмаськомы. Огъя тираж 32 сюрс пала экземпляр луоз. Выль дышетскон ар азьын соосты Удмуртиысь, озьы ик бускель улосвылъёсысь – Татарстанысь но Башкортостанысь – школаосы келялозы», – вераз лыдӟетпоттоннилэн кивалтӥсез Юрий Кузнецов.

Учебникъёсты УЭ-ысь йӧскалык дышетонъя институт дасяз УЭ-ысь дышетонъя но тодосъя министерство куремен. Ваньмыз ужъёс эскеретэ (экспертизае) сётэмын вал но йылпумъянъёсъя федерал лыдметэ пыртэмын.

Со дыре ик лыдӟетпоттонни ӧнерчиосыныз ӵош «История нашего края. Удмуртия» учебникъёсты (12+) кылдытон бордын ужа. Со 5-7-тӥ классъёслы сӥземын УЭ-ысь дышетонъя но тодосъя министерство куремезъя. Тодэ вайытомы, 2024-тӥ арын Удмуртия вордскем шаерлэн историез сярысь учебникъёс кылдытонъя пилотной ӵектосэ пыриз. Дышетон пособиос Россиысь калыкез дышетонъя министерствоын эскеронъёсты ортчизы ни. Вань тупатэмъёсты лэсьтэм бере соосты печате сётозы, но 2026-тӥ арын ни улосвылысь дышетсконниосъя люкылозы.

Удмурт Элькунысь Тӧролэн но Кивалтэтлэн ивортодэтъя