16-тӥ оштолэзе «Удмурт Кенеш» но «Удмурт нылкышно кенеш» огазеяськонъёс Ижкарысь кун эм академиен «Ашальчи лыдӟонъёс» улоскуспо конференция радъязы. Ужрад сӥземын Акилина Григорьевна Векшиналы (Ашальчи Окилы), нырысетӥ удмурт нылкышно кылбурчилы, эмчилы, фронтовиклы, но Быдӟым Атыкай ожын Вормонлэн 80 ар тырмонлы.

Конференцие тодосчиос, журналистъёс, литература, мерлыко удысъёсысь ужасьёс, Ашальчи Оки нимо йӧскалык примен пусъем лауреатъёс, Татарстанысь, Башкортостанысь, Пермь улосвылысь удмуртъёслэн йӧскалык-лулчеберетъя огазеяськонысьтыз ёзчиос, студентъёс но школаез йылпумъясьёс пыриськизы.

«Удмурт нылкышно кенеш» огазеяськонлэн кивалтӥсез Елена Миннигараева пыр-поч вераз «Удмурт нылкышно геройёс: кинъёс соос? Удмуртские женщины герои: кто есть кто?» конференциез радъян сярысь.

Люкаськемъёс буре ваизы удмурт нылкышно геройёсты, соослэсь ӟеч лэсьтэм ужъёссэс. «Удмурт нылкышно кенеш» огазеяськонлэн кивалтӥсез пусйиз, ож вакытэ УЭ-ысь комсомоллэн обкоменыз 9 мобилизация ортчытэмын ас мылкыд карись нылкышноос понна. Оже 2500 пала егит нылъёс но кышномуртъёс келямын вал. Лыдӟиськонъёсын нылнышно-геройёслы сӥзем тунсыко докладъёс чузъяськизы.

Конференцилэн одӥгез валтӥсь люкетэз – Ашальчи Оки нимо йӧскалык премия сётон. Со 1994-тӥ арын юнматэмын «Удмурт Кенеш» огазеяськонэн «Удмурт нылкышно кенеш» огазеяськонлэн кичӧлтэменыз. Та данъетэн пусйисько шаерысьтымы адӟем карымон нылкышноос, кинъёс трос кужымзэс, дырзэс сёто анай кылмес, удмурт лулчеберетмес, тодос, дышетон, эм удысъёсты азинтонлы.

Таяз аре премия сётӥзы – Россиысь дано но Удмуртиысь калык артистка Фаина Будиналы но Пичи Пурга ёросысь Вуж Мӧнья гуртысь дышетӥсьлы, мерлыко ужасьлы Мария Никитиналы.