УЭ-ысь Кивалтэтын Удмуртиысь Тӧролэн но Кивалтэтлэн Администрацизылэн кивалтӥсез Александр Журавлев радъям брифингын журналистъёслы вераз, кызьы Калыкъёслэн огазеяськон нуналзы но Удмуртилэн кунлык басьтэм нуналзы ортчоз. Ужрадэ озьы Йӧскалык политикая министр Эдуард Петров но Активной кусып возёнъя центрлэн кивалтӥсез Евгения Сундукова пыриськизы.

Кызьы пусйиз Александр Журавлев, та кык ужрадъёсты ӵош ортчытон – со огкылысь но тупаса улонэз возьматӥсь тодмет.

«Элькунмылэн валтӥсь данбурез – солэн адямиосыз. Туэ Данъян пулэ Шор площадьын асьмеос 54 адямиез но 15 коллективез пыртӥмы. Бырйыку, нимысьтыз саклык висъямы соослы, кинъёс нимысьтыз ожгар операцие пыриськисьёслы юрттэт сёто но Вормонэз матэкто, нырысь ик – обороная но промышленностья огъетысь ужасьёслы», – пусйиз со.

Та праздникъёс улсын валтӥсь ужрад – Кун приём, кудӥз 1-тӥ шуркынмонэ 12:00 Калыкъёслэн Эшъяськон юртазы ортчоз. Отын Кун премилэн лауреатъёсыз тодмо луозы но Россия Федерациысь Азьмуртлэн данъетъёссэ сётозы.

Муниципал кылдэтэтъёсын озьы ик яркыт программа луоз. Ужрадъёс вань каръёсын но ёросъёсын ортчозы. Валтӥсь ужрад – 4-тӥ шуркынмонэ Воткакарысь «Юбилейный» лулчеберетъя дворецын концерт.

Мукетыз бадӟым ужрад — дасэтӥез Бадӟым этнографической диктант.

«Та акция Удмуртиын кылдӥз но табере быдэс дуннеысь калыкез огазея. 2024-тӥ арын ужрадэ 3,5 миллионлэсь трос адями пыриськиз 170 кунъёсысь. Атыкай музъемез утисьлэн араз диктантын нырысетӥяз нимысьтыз ожгар операцие пыриськисьёс видео амал пыр юанъёссэс сётъялозы», – вераз Удмуртиысь Тӧролэн но Кивалтэтлэн Администрацизылэн кивалтӥсез Александр Журавлев. Акция 1-тӥ шуркынмонэ радъяськоз Россиын но кунсьӧрын. Удмуртиын валтӥсь ортчытон интыез – Йӧскалык лыдӟетъюрт. Диктантэз онлайн амалэн но ортчыны быгатонлык луоз. 1-8-тӥ шуркынмонэ национальнаяполитика.рф вотэсбамын.

Министр «Можем-Поможем. Семейный центр социокультурной адаптации мигрантов» ӵектослэсь кутскемзэ сярысь вераз. 1-тӥ шуркынмонысен арнялы быдэ ӟуч кылэз дышетонъя но пӧртэм мастер-классъёсъя семья пумиськонъёс ортчылозы. Аслэсьтыз ужзэ азьланьтоз «Герои народа – Герои страны» ӵектос но, кудӥз туэ гинэ школаын дышетскисьёслэсь 2000-лэсь трос эссеосты ини люказ.

Нимысьтыз саклык Удмуртилэн кунлык басьтэм дырысеныз 105 ар тырмонлы. Праздник улсын Удмурт автономилэн кутсконаз сылӥсь муртъёслэн синпелетъёссы тупатэмын луозы, нош арлэн пумаз Ижкарын мемориал пулъёс пуктозы ньыль дано удмурт тодосчиослы: Куликов Кузьма Ивановичлы, Кельмаков Валей Кельмаковичлы, Владыкина Татьяна Григорьевналы, Тараканов Иван Васильевичлы. Соослэн тыршемзы, ужъёссы бадӟым узырлык калыктодос но кылтодос удысъёсы ваизы.