Лулчеберет кичӧлтонъёсъя Президентлэн фондэзлэн нырысетӥ вожвылъяськонэзъя йылпумъянъёсыз тодмо луизы. Калыкъёслэн Эшъяськон юртсылэн но «Артэ» этнокультура дышетонъя центрлэн ӧнерчиосыз «Маршрут построен! Удмуртия многонациональная» (6+) ӵектосэнызы вормизы.

Проектлэн инъетэз – Удмурт Элькунлэн гуртъёсаз улӥсь калыкъёсты блог-тур но тревел-шоу амалэн тодматон. Та ужрадэ трос йӧскалыкъем егитъёс пыриськозы, кудъёсыз «ВКонтакте» мер вотэсбамзэс нуо.

Блог-тур кутскон азьын пыриськисьёслы дышетон ужрадъёс ортчытозы, кудъёсыз сӥземын луозы Удмуртиын улӥсь пӧртэм калыкъёслэн кусыпъёссылы но SMM-азьланьтонлы. Маршрут 8 нунал кыстӥськоз, адямиос 7 гуртэ вуылозы, кудъёсаз ӟучъёс, лымшор но уйпал удмуртъёс, бигеръёс, поръёс, чувашъёс но бесерманъёс уло.

Валтӥсь йылпумъян — гурт но солэн улӥсьёсыз сярысь 7 шулдыръяськон шоуосты, блог амалэн 4 видеороликъёсты, ВКонтакте вотэсын Россиысь калыкъёс сярысь 60 клипъёсты поттон. Азьланяз та ваньмыз эскерисьёс понна узыр материал луоз. Ӵектос 2025-тӥ аре оштолэзе кутске.

Трос йӧскалыкъем Удмуртиетӥ маршрут юрттоз пӧртэм калыкъёслэсь вераськон кусыпъёссэс юнматыны, Россиысь калыкъёслэн историзы но лулчеберетсы сярысь тодон-валанзэс ӝутыны, егитъёслэсь быгатонлыкъёссэс усьтыны, калыкъёс куспын эшъяськонэз пыр-поч возьматыны.

Лулчеберет кичӧлтонъёсъя Президентлэн фондэзлэн 2025-тӥ арлэн нырысетӥ вожвылъяськонэзъя Удмуртия нырысетӥосыз пӧлы пыремын ас вормон ӵектосъёсыныз. Кун йӧскалык политика удысын 15 ӵектосъёслы коньдон юрттэт сётэмын оглом 9 миллион манетлэсь трос.