17-тӥ инвожое Вотка ёросысь Пихтовка черкогурт котырысь чебер-шулдыр интыосын ортчиз улоскуспо Гербер (0+) йӧскалык праздник.

Удмурт гужем шулдыръяськон Беларусь, Шри-Ланка, Москва, Санкт-Петербург, Татарстан, Марий Эл, Башкортостан, Пермь, Киров, Свердловск но трос мукет улосвылъёсысь ог 20 сюрс адями котыраз люказ.

Герберын туэ ваньмыз герӟаськемын вал чорыген (ӟуч: «рыба»). Пихтовка «вуоноысь гурт» но татысь огазеяськон угось быдэс шаермылы но, солэн палэназ но тодмо луэ чорыг будэтэменыз. Чорыг юнме быръемын ӧй вал – соин герӟаськемын удмуртъёслэн тросэз воршуд нимъёссы. Вашкалаослэн оскемзыя, Музъем, пе, возиське ошлэн сюръёсыз вылын, нош со бадӟым чорыг вылын сылэ.

Улосчиосты бусы ужъёслэн быременызы ӟечкылаз Удмурт Элькунысь Кивалтэтлэн Тӧроез Ярослав Семёнов: «Россия музъем бордысен кутске. Ми трос пол возьматӥм ини, Удмуртиез но быдэс Россиез сюдыны быгатӥськом шуыса, сиён-юон пумысен кышкытлыкъёслэсь ми ум курдаське. Туэ но мед удалтоз».

Ужрадэ Росгидрометысь но Белгидрометысь вуэм огмуртъёс пыриськизы, соос азьвылгес кенешонзэс ортчытӥзы. Куноос праздникез вылӥ дунъязы, шулдыръяськонлэсь зэмос удмурт шӧмзэ пусйизы но капчи мылкыдын кылизы.

Ярослав Семёнов но Кивалтэтлэн Тӧроезлэн воштӥсез Ольга Абрамова кибашлы ужасьёсты кузьымъёсын данъетазы.

Удмурт Элькунысь йӧскалык политикая министр Эдуард Петров пусйиз:

«Туннэ быдэс элькунэнымы Гербер удмурт йӧскалык шулдыръяськонэз пусйиськомы, кудӥз герӟаськемын тулыс бусы ужъёсты йылпумъянэн. Та нуналэ нош но нош тау кылъёс вераммы потэ тыршись калыкмылы, гурт возёс удысысь ужасьёслы. Соослы луыса Удмурт шаермы ёрмытэк но шудо-буро улэ. Ваньдылы сӥзисько ӟеч шутэтскон, нош сӥзьыл – узыр ю-нянь но чебер емышъёс!»

Герберын ортчиз «Лякиё шобрет» (Лоскутный ковёр) арт-проект, отын кылдытӥзы аспӧртэмлыко синпелет: ёросъёсысь Кибашлыослэн юртъёсазы тыршисьёс лэсьтӥзы-вуризы ёроссылэн гербзылы сӥзем лякиё шобретъёс. Шулдыръяськонын соос ог-огзы борды вуремын вал, озьы кылдӥз быдэс шаермылэн лякиё шобретэз.

Пусйымон, лыктэм куноосты удмурт фольклорысь но мифологиысь геройёсын, дуннелэн кылдэменыз  но тодматӥзы шуыса. Валтӥсь сцена зэмос шормуӵлы пӧрмиз, кудӥз фонтанъёсын, вуэн котыртэмын вал. Пересьёслэн оскемзыя, Музъем возиське ошлэн сюръёсыз вылын, нош ачиз ош бадӟым чорыг вылын сылэ. Экспозиция Менсадык Гариповлэн суредасьлэн ужез борды пыкиськыса лэсьтэмын вал.

Ужрадын «Даур ТВ» удмурт кылын интернет-телеканал ужаз. Мылкыд карисьёс ВКонтакте вотэсбамын Герберез онлайн амалэн учкыны быгатӥзы, нош Гербере лыктэм куноослэн съёмкаосы пыриськыны луонлыкысы вал.

Шулдыръяськонын пӧртэм азбаръёс ужазы: «Куно пумитан», «Вӧсян», «Жингрес возьвыл». Лымшор но уйпал удмуртъёс куспын ортчиз «БОНЫ vs. БЕНЫ» футболъя ӵошатскон. Командаослэн нимъёссы удмурт кыллэн диалектъёсыныз герӟаськемын. Уйпал удмуртъёс ӟуч «да» кылэз «бен» шуо, нош лымшор удмуртъёс – «бон». Шудыны мылкыд каризы уйпал но лымшор ёросъёсысь улосчиос.

Нырысьсэ элькунысь муниципал кылдытэтъёсысь Тӧроос вискын «Чорыг кутылон» нимо ӵошатскон радъязы. Отын мыло-кыдоос кужымзэс мертазы лескаен чорыгаса, чорыгез киын кутылыса, дротик лэзьяса но вал вылын ворттылыса. Герберлэн одӥгаз азбараз егитъёслы сӥзем «Куара-ланга» фестиваль ортчиз, кытын крезь но мукет инструментъёс чузъяськизы. Праздниклэн валтӥсь кизилиез чотын луиз кырӟанъя но эктонъя «Италмас» Академической ансамбль.

Гербер спорт удысысь выль амалъёсты усьтэ-кылдытэ! Спортэн тужгес но зол эшъяськись куноос Дэрэмбол шудонэн шудӥзы. Пыриськисьёс, тупез киын кутылытэк, айшетэн сое сетка вылтӥ сётъязы но, кутылӥзы но.

Та нуналэ вашкала сям-йылолъёсты но улӟытыны тыршизы. Азьло Гербер шулдыръяськонын бусы сюан ортчытъяло вал. Ог-огзэс гажась егит нылашез но пияшез вуоно «карт» но «кышно» карыса дӥсяло. Озьы семья кылдытыны дась луэмзэс возьмато. Туэ но ёросысь егитъёс «Бусы сюан» (Свадьба поля) шудонэ-вожвылъяськонэ пыриськизы.

Гербер шулдыръяськон – удмуртъёслэн вашкала сям-йылолзы, кудӥз тулыс бусы ужъёсты йылпумъянэн герӟаськемын. Туннэ нуналъёсы та тужгес бадӟым но кема возьмам нунал. Со быдэсак возьматэ удмурт калыклэсь лулчебертсэ но сям-йылолъёссэ

Вуоно арын Гербер Шаркан ёросын ортчоз.