21-тӥ инвожое Якшур-Бӧдья ёросысь Кекоран черкогурт котырын «Гербер» улоскуспо йӧскалык шулдыръяськон ортчиз. Гербер шулдыръяськон – удмуртъёслэн вашкала сям-йылолзы, кудӥз тулыс бусы ужъёсты йылпумъянэн герӟаськемын. Со быдэсак возьматэ удмурт калыклэсь лулчеберетсэ но сям-йылолъёссэ. Элькунысьтымы улӥсьёслэн та ужрадэ пыриськемзы лулчеберетэз утёнлы но азинтонлы юрттэ, со «Семья» йӧскалык ӵектослэн азьмугъёсызлы тупа.

Гербере 15 сюрслэсь трос куноос вуылӥзы: быдэс Удмуртиысь, озьы ик Татарстанысь, Башкортостанысь, Пермь, Киров улосъёсысь, Марий Элысь, Москваысь но Санкт-Петербургысь. Вань люкаськемъёсты УЭ-лэн Тӧроез Александр Бречалов ӟечкылаз:

«Та шулдыръяськон гуртын ужасьёслэсь мыло-кыдо тыршемзэс данъя. Таяз аре инкуазьлэн потӥз асьмемыз эскерыны: трос шугъяськонъёс кылдытӥз, нош ми быгатӥмы соосты вормыны. Удмуртиын 910 сюрс гектар музъеме пӧртэм будосъёсын киземын, со пӧлысь 268 сюрсэз – валэс юос. Кемалась кутӥськымтэ музъемъёсты но выльысь уже кутӥськомы. Вить ар ӵоже 55 сюрс гектарез кизиськомы. Музъем вылын ужало ке, гурт, калык улэ, тросгес ӟеч но ческыт емыш поттӥське».

Со ватсаз, та Герберез радъян инты тужгес но тупась луэ, малы ке шуоно татын ож вакытэ Удмуртиысь калык «Ижкар-Балезино» чугун сюресэз лэсьтӥз. Та сюрестӥ ож аръёсы нюлэс, эгыр, корт нуллӥзы, ожгарчиос фронтэ кошкылӥзы. Нош туэ ми пусйиськомы Быдӟым Вормонлы 80 ар тырмонзэ.

Герберлэн валтӥсь тодметэз луоз удмурт пужы. Якшур-Бӧдья ёросын паськыт вӧлмемын «вприкреп» пужыятон амал. Али но со эскериське но улонэ вӧлме. Таӵе амалэн кылдэм арбериос «бӧдья позумент» нимасько, со ёрослэн адӟымон карем ӵектосэз луэ.

Удмурт пужы – аспӧртэмлыко суред, кудӥз удмурт калыклэсь лулчеберетсэ но сям-йылолъёссэ шарая. Солэн тодметъёсыз – лякыт пусъёс, кылсярысь, котретъёс, гожъёс но треугольникъёс. Та черодъяськись пужы адямиослы удмурт лулчеберетэ муромыны юрттэ.

Герберын пӧртэм азбаръёс ужазы: «Куно пумитан», «Вӧсян», «Куно азбар». Лымшор но уйпал удмуртъёс куспын «БОН vs. БЕН» футболъя ӵошатскон.

«Куэм выжлёгет» акция – куноос сьӧразы выжлёгет ваизы, собере адӟытон кылдытэмын вал.

Удмурт егитъёслэн «Шунды» огазеяськонзылэн ёрос ёзэтъёсысьтыз огмуртъёссы «Пужыё сюрес» шудон-вожвылъяськонэ пыриськизы. Та ужрад удмурт калыклэсь лулчеберетэз, егитъёслы сӥзем ӵектосъёс но ёрослэн адӟымон интыосыз сярысь тросгес тодыны юрттӥз.

«Кечат-Вамат» визьбуро шоу-викторинае ёрос но кар командаос пыриськизы.

Куноосты муниципал кылдытэтъёсысь артистъёс, озьы ик «Айкай» фольклор кырӟанъя но эктонъя кун театр шумпоттӥзы.