20-тӥ инвожое Глаз ёросысь Коӵышгурт вӧзын «Гербер» (0+) удмурт йӧскалык шулдыръяськон ортчоз. Йӧскалык праздник Россиысь калыкъёслэн огъя луэмзылэн араз яркыт ужрадэз луоз. Гербер – бадӟым ӵектос: со элькунысь улӥсьёсты но куноосты огазея, удмурт калык лулчеберетэн тодматэ.

«Валче уломе!» ужрадэн усьтӥськиз шулдыръяськон. Со Глаз ёросысь дано адямиослы сӥземын вал. Туэ Гербер батыръёсын герӟаськемын вал. Ужрадын нырысетӥез оратория жанръя произведение чузъяськиз – элькунысь артистъёс но хорын кырӟасьёс удмурт гожъяськисьлэн но тодосчилэн Михаил Атамановлэн «Тангыра» эпосысьтыз мадьёсъя гожтэм композициосты быдэстӥзы.

Гербере 15 сюрслэсь трос куноос вуылӥзы быдэс Удмуртиысь, озьы ик Татарстанысь, Башкортостанысь, Пермь, Киров улосъёсысь, Марий Элысь, Москваысь но Санкт-Петербургысь. Вань люкаськемъёсты УЭ-лэн Тӧроез Александр Бречалов ӟечкылаз.

«Удмуртиын 900 сюрс гектар музъеме пӧртэм будосъёсын киземын. Туэ кизён ужъёсмес валче быдтӥмы. Тужгес но устоосыз пӧлын асьмелэн Алнаш но Можга ёросъёс. Та шулдыръяськон гуртын ужасьёслэсь мыло-кыдо тыршемзэс данъя. Музъем вылын ужало ке, гурт, калык улэ, тросгес ӟеч но ческыт емыш поттӥське. Нимысьтыз тау Глаз ёрослы шулдыръяськонэз радъямды понна. Вань куноослы – ӟеч дырзэс пусйыны. Армы пайдалыко мед луоз!».

Удмуртилэн Тӧроез Александр Бречалов гурт возёс удысысь азинлыко ужасьёслы данъетъёс сётӥз. Озьы ик Элькунысь дано адямиосты пусъемын вал.

Валтӥсь сценаын йӧскалык но калыккуспо огазеяськонъёс шулдыртӥзы: «Тангыра, тангыра, куарадэ будэты…» – Удмуртиысь но Россия Федерацилэн улосъёсысьтыз фольклор коллективъёслэн кырӟан-эктонъёссы; Удмуртиысь Академической хоровой капеллалэн шулдыртэмез; Калык кырӟанъя но эктонъя «Айкай» удмурт кун театрлэн шулдыртэмез.

Озьы ик нунал ӵоже ужазы творчествоя но спортъя пӧртэм площадкаос. Соос пӧлын:

«Кибашлы арама» – кибашлыослэн, ӧнерчиослэн, дизайнеръёслэн ужъёсынызы вузкарон инты, мастер-классъёс;

«Вузаськон арама» – сиён-юонэн вузкарон инты;

«Шудон» – нылпи шудон инты;

Этнобызьылон – трейл бызьылон;

«Воршуд» – ӵыжы-выжыосты тодон, ӵыжы-выжы сям-йылолъёс но соослэн туала улонын интызы сярысь кенешон;

«Писпу кужым» – егитъёслэн этно-марафонзы;

«Шаплы пила» – кибашлыослэн ужъёсынызы тодматскон;

«Батыр кужым» – кужмо, чупырес луэмез но шонер йӧттыны быгатэмез эскеронъя спорт ӵошатсконъёс;

«Бенъёс но Бонъёс» – уйпал но лымшор удмуртъёслэн командаоссы куспын футболъя вожвылъяськон.

Элькунысьтымы улӥсьёслэн йӧскалык шулдыръяськонъёсы пыриськемзы лулчеберетэз утёнлы но азинтонлы юрттэ, йӧскалык кусыпъёсты юнматэ, со «Семья» йӧскалык ӵектослэн азьмугъёсызлы тупа.