15-31-тӥ толшоре 2024-тӥ аре Россиын дасэтӥ ползэ «Холокостын быремъёсты буре ваёнлы сӥзем Арня» ортчоз. Таӵе мерлыко ужрад 2015-тӥ арысен радъяське ини, ХХ дауре ортчем шимесъёсыз пӧлысь огезлы учырлы сӥземын.

Удмуртиын валтӥсь ужрадъёс 25-тӥ толшоре Калыкъёслэн Эшъяськон юртазы радъямын луозы. 15:00 часын «Халом» нимо арнянунал (воскресной) еврей школаысь дышетскисьёс «Я должна рассказать» (12+) трос йӧскалыкъем спектаклез возьматозы. Солэсь инъетсэ кылдыто 14-18 аресъем еврейёслы нимысьтыз висъям кварталын (гетто) но кык нацист концлагерьёсын улӥсь нылашлэн дневникысьтыз гожтэмъёс. Маша дневниксэ гожъяса улӥз но гожтэмъёссэ учкытэк вералляз.

Та нуналэ «Давидлэн Кизилиосыз» нимо мастер-класс ортчытэмын луоз, пыриськисьёс нацист оккупациын улэм еврейёслы, та калыклы жалян мылкыдэз возьматонлы сӥзем фильмез учкозы.

Калыкъёслэн Эшъяськон юртсылэн 3-тӥ этажын холлаз, выль история но документъёс вылэ пыкиськыса, адӟытон дасяло, со нимаське «Холокост: уничтожение, сопротивление, спасение». Адӟытон 18 стенд-роллапъёслэсь кылдоз, отчы пыртэмын луозы ужкагазъёс, суредъёс но туспуктэмъёс Россилэн но кунсьӧрлэн 25 архивъёсысьтыз. Тросэз нырысетӥ ползэ адӟытэмын луозы. Тросаз учыръёсы учкись кылыны быгатоз стенд вылэ туспуктэмысь адямилэсь зэмос куаразэ.

27-тӥ толшоре 1945-тӥ аре 19:45 часэ быдэс Россиын «Недели памяти 2024» онлайн амалэн ужрад ортчоз – Холокостын быремъёслы сӥзем «Свеча памяти» огъяроссия мемориал акция. Пыриськыны быгатозы ваньзы, кинлэн аслаз вотэс бамез вань. Кулэ луоз 19:45 часын сюсьтыл ӝуатыны, туспуктэм лэсьтыны но вотэс бамады пуктыны #Неделяпамяти хештеген. Озьы ик луонлыкты вань гожтыны, малы Холокостын быремъёсты буре вайыны кулэ. Акцилэн дырыз – со 1945-тӥ арысь 27-тӥ толшор сярысь тодэ ваён, соку Горд Армия «Аушвиц» (Освенцим) лагерез мозмытӥз. Соку пытсэтын пукисьёс эрико луизы.