14-28-тӥ толшоре 2026-тӥ аре Россиын дас кыкетӥ ползэ «Холокостын быремъёсты буре ваёнлы сӥзем Арня» ортчиз. Таӵе мерлыко ужрад 2015-тӥ арысен радъяське ини, ХХ дауре ортчем шимесъёсыз пӧлысь огезлы учырлы сӥземын. Быдэс арнялы пӧртэм мемориальной но югдытӥсь ужрадъёс малпамын вал.

Та выллем ӵектосъёс бадӟым уж лэсьто – историез утён сяна, соос пиналъёсмылы юрттыны тыршо адями ӟечлыкез гажаны. Та ваньмыз «Семья» йӧскалык ӵектослэн азьмугъёсызлы тупа.

Калыкъёслэн Эшъяськон юртазы «Холокост: уничтожение, сопротивление, спасение» нимо история но документъёс вылэ пыкиськыса адӟытон дасямын вал. Ужкагазъёс, туспуктэмъёс но зэматонъёс пыр адӟытон нацизмлэсь сьӧд ужъёссэ шарая но калыклэсь юн луэмзэ возьматэ.

Вань пыриськисьёслы ӟечкылан кылъёсын вазиськись УЭ-ысь Йӧскалык политикая министрлэн воштӥсез Александр Филатов. Солэн верамезъя, таӵе ужрадъёс туж но туж кулэ.

Ужрадэ озьы ик пыриськизы Ижкарысь Дышетонъя кивалтонниысь начальниклэн воштӥсез Ольга Моторина но УЭ-ысь Дышетонъя но тодосъя министерствоысь ватсаса тодон валан сётонъя ёзэтысь кивалтӥсьлэн воштӥсез Светлана Сентякова. Соос пиналъёс доры вазиськизы, та выллем ужрадъёслэсь кулэлыксэ пусйизы.

Холокостын быремъёсты буре ваёнлы сӥзем Арня пайдалыко акцилы кемдӥз. Со тодэ вайытэ – вашкалаез тодон – со тупаса но ӟеч улонлы инъет тӥрлык, со калык кусыпъёсты юнматонлы но герӟаськонлы юрттэт.