15-тӥ но 16-тӥ куартолэзе «Чекерил» спортъя курортын йӧскалык политика удысын ужась ӧнерчиослы дышетонъя семинар радъямын вал. Пыриськизы УЭ-ысь интывыл кылдытэтъёсысь ужасьёс, кудъёсыз кун йӧскалык политикаез улонэ вӧлмытонъя кулкутӥсьёс, но  УЭ-ысь йӧскалык политикая министерствоысь но Калыкъёслэн Эшъяськон юртысьтызы ӧнерчиос.

Люкаськемъёсты Удмуртиысь Тӧролэн но Кивалтэтлэн Администрацизылэн кивалтӥсез Александр Журавлев но йӧскалык политикая министр Эдуард Петров ӟечкылазы.

Эдуард Петров пусйиз, семинарлэн валтӥсь ужпумез – со туала Россиын терроризмлы но экстремизмлы пумит султон, элькунын нылпиосмес тупаса но огкылысь улоны дышетыны тыршоно.

Ужрадэз сӥё-дано усьтэм бере ужан люкет кутскиз. Экспертъёс докладъёссэс дасязы, дышетон уж нуизы.

Семинарлэн кыкетӥ нуналаз йӧскалык политика удысын егитъёслы сӥзем но муниципал ӵектосъёсты эскеризы, озьы ик кенешизы УЭ-ын миграци политика но МВД-ен 2024-тӥ ар понна экстремизмлы пумит султон удысын лэсьтэм ужъемышъёсыз сярысь.

Ужрад йылпумъяськем бере вань пыриськисьёс зэматонъёс (удостоверениос) басьтӥзы.

Ивортодэт УЭ-ысь Тӧролэн но Кивалтэтлэн вотэсбамысьтызы.