2024-тӥ арын Бадӟым Удмурт Диктант (БУД) Семьялэн Арезлы, семья дунлыкъёсты утёнлы сӥземын луоз. Туэ диктантлы текст дасяз гожъясьчи, «Удмурт дунне» газетлэн валтӥсь редакторез но «Удмурт нылкышно кенеш» огазеяськонлэн кивалтӥсез Елена Миннигараева.

Акция 6-тӥ оштолэзе очной но заочной амалъёсын радъяськоз.

Ужрадэ вань мылкыд карисьёс нимысьтыз площадкае лыктыса яке телевизор, «Мынам Удмуртие» радио пыр кылзыса (13.00 часын Ижкарлэн дырызъя) пыриськыны быгато. Ужъёсты diktant2024@yandex.ru электрон адресэ келяно луоз. Озьы тодосчиос гожтэм диктанттэс эскерыны быгатозы. Площадкаос быдэс Удмуртиын радъямын луозы, нош Калыкъёслэн Эшъяськон юртазы тужгес но тунсыкоез площадка ужалоз!

Диктантлы текстэз дасясь Елена Миннигараева вераз:

«Бадӟым Удмурт Диктантлы текст гожтон – паймымон тунсыко уж. Уг ваты, мыным капчигес луысал газетэ верос яке статья гожтыны. Нош диктант… Мон валасько вал, текст валамон кулэ луыны дышетскисьлы но арлыдолы, карын но гуртын улӥсьлы, тодосчилы но гурт возёсын ужасьлы… Со дыре ик текстлэн быдӟалаезлэсь но огъя куронъёслэсь палэнэ потыны уг яра.

Марлы диктантэз гожто? Аслэсьтыд тодон-валанъёстэ эскерыны, таяз учыре удмурт кылэз гажамдэ возьматыны. Мукет ласянь, туж потэ вал, текст кыӵе ке кулэ луись малпанэз мед усьтоз шуыса, ваньзылы матын мед луысал. Туэ ар – Семьялэн Арез. Диктантлэн текстэз семьялы, анайлыклы но семья дунлыкъёслы сӥземын.

Тодӥсько, тросэз понна Бадӟым Удмурт Диктантэз (БУД) гожтон – бадӟым праздник. Адямиос быдэс ар возьмало сое, дасясько солы. Акцие пыриськисьёслэн лыдзы ялын йылэ. Тодӥсько, тросэз семьяосын ужрадэ пырисько шуыса. БУД огазея. Малпасько, диктант секыт уз поты. Ваньдылы мед удалтоз!»