11-тӥ оштолэзе «Бадӟым удмурт диктант» (6+) арлы быдэ ортчись акция ортчоз. Туэ со 15-тӥ позэ ни радъямын луоз. Диктантлэн авторез «Удмурт Кенеш» огазеяськонлэн ёзчиез, тодмо мерлык ӧнерчи, гожъяськись Наталья Михайлова. Туэ ужрад Россиысь калыкъёслэн огъя луэмзылэн арезлы сӥземын луоз.

Диктантэз гожтон «Егитъёс но пиналъёс» йӧскалык ӵектослэн ужпумъёсаз пыре. Та ӵектос 2025-тӥ арысен кунмылэн Азьмуртэныз Владимир Путин юнматэмен улонэ пыӵа.

Акцие 11-тӥ оштолэзе очной но заочной амалъёсын пыриськыны луоз.

13:00 часын «Мынам Удмуртие» радио пыр кылзыса яке «Удмуртия» телеканалэз ӝуатыса диктантэз гожтыны. Ужъёсты diktant2026@yandex.ru электрон адресэ келяно луоз («Бадӟым удмурт диктант» пусэн) яке таӵе адресъя: 426069, Удмурт Элькун, Ижкар к., Луо ур., 9. Озьы тодосчиос гожтэм диктанттэс эскерыны быгатозы.

Озьы ик 13:00 часын вань мылкыд карисьёс понна каръёсын но ёросъёсын нимысьтыз площадкаос усьтэмын луозы Удмуртиын но солэн палэназ. Ижкарын валтӥсь площадка луоз – Калыкъёслэн Эшъяськон юртсы.

Со сяна вань мылкыд карисьёс удмурт кыллы, калыклы, йӧскалык кусыпъёслы сӥзем тест ортчыны луонлык вань. Со нимысьтыз вотэсбамын пуктэмын луоз. Котькудӥз, кин тестэз ортчоз, сертификат кутоз.

«Бадӟым удмурт диктант» акцилэн радъясьёсыз: «Удмурт Кенеш» мер огазеяськон, «Удмуртия» телерадиокомпания, Калыкъёслэн Эшъяськон юртсы, Удмурт кун университетысь Удмурт кылосбуръя, финно-угроведениея но журналистикая институт. Ужрад УЭ-ысь йӧскалык политикая министерстволэн юрттэменыз ортче.

Чаклалэ иворъёсты, ӝоген быдэс элькунысь площадкаосты поттомы!

Тодэ вайытом, Удмуртиын но солэн палэназ диктант 2012-тӥ арысен радъяське. Котькуд ар акция элькунлэсь но удмурт калыклэсь валтӥсь ужпумъёссэ шарая. Диктант сярысь пыр-почгес тодыны нимысьтыз вотэсбамын луэ. 2025-тӥ арын Бадӟым удмурт диктантэз 3 сюрлэсь трос адями гожтӥз.