«Можем-поможем. Семейный центр социокультурной адаптации мигрантов» ӵектос улсын Калыкъёслэн Эшъяськон юртазы таджик воскресной школа усьтӥськиз. «Ориён-Тадж» («Благородные») Удмуртиысь таджик мерлык центр» Элькун мерлык огазеяськон кичӧлтэмен семья субботникын усьтӥськиз.

Та ужрад таджик калык понна бадӟым кулэ луись вамысь луэ: лулчеберет узырлыксы йылоз, утиськоз но вӧлмытӥськоз. Воскресной школа луоз сыӵе инты, кудаз бадӟымъёс но пичиос кылэз, сям-йылолъёсты но устолыкез тодозы, эскерозы но ог-огзылы адӟытозы.

Сӥё-дано усьтонын люкаськемъёсты ӟечкылазы УЭ-ысь йӧскалык политикая министрлэн воштӥсез Александр Филатов, йӧскалык-лулчеберетъя огазеяськонъёслэн кивалтӥсьёссы но азьветлӥсьёссы.

«Туннэ нунал понна элькунамы армян, азербайджан, узбек но еврей йӧскалык воскресной школос ужало. Ужрадъёс нылпиосын валче ортчытӥсько. Туннэ ми таджик воскресной школа усьтӥськомы. Озьы малпамын вал, малы ке шуоно кулэлыкез кылдӥз. Статистикаез чакланы ке, асьме доры арлы быдэ трос кунсьӧрысь адямиос вуыло. Таджикисанысь вуэмъёс – кыкетӥ интыын. Нылпиосын но вуыло. Соин ик, милемлы, элькунамы улӥсьёслы, кулэ, мед соос шаплыгес асьме мерлыкамы дышозы шуыса», – вераз Александр Филатов.

Минитсрлэн воштӥсез валтсаз на, школаын валтӥсез – со ӟуч кыллы дышетон, мерлыкын астэ шонер возён. Ужрадъёсы мукет йӧскалыкысь но нылпиос пыриськозы, мед соос но таджик лулчеберетэн тодматскозы шуыса.

Озьы ик Анай кыллэн калыккуспо нуналэз улсын нылпиос «Кыл – калыклэн лулыз» («Язык — душа народа») вожвылъяськонэ пыриськизы. Соос анай кылынызы кылбуръёс лыдӟизы.

Семья субботникъёсы 50-лэсь трос семьяос вуыло – азербайджан, армян, узбек но таджик. Соослы мастер-классъёс, ӧнерчиосын пумиськонъёс, лекциос, консультациос, спорт ӵошатсконъёс радъяло. Радъясьёслэн малпанзы – арлэн пумаз пыриськисьёслэсь лыдзэс кык поллы бадӟыматыны. Нош ӵектослэн йылпумъянэз луоз «Мигрантъёслэн семья азбуказы» («Семейная азбука мигрантов») – выль кунын улонъя индылэт. Субботникъёс южтолэзьлэн пумозяз кыстӥськозы на. Пыриськыны быгато мигрантъёслэн семьяоссы 6 аресысен 12 аресозь.