1-тӥ инвожое 10:00 часын Калыкъёслэн эшъяськон юртазы «Погыли» (0+) Удмурт робо-чемпионат радъяськоз.

Робо-чемпионат – со «“Погыли” нылпи робостудия» ӵектослэн йылпумъясь ужрадэз. Со сӥземын егит дышетӥсьёслы но 6–9 аресъем удмурт нылпиослы, робототехника амалэз уже кутыса, дышетскисьёс кылъя быгатонлыксэс узырмытыны но азинтыны быгатозы. Дышетскон ар ӵоже та ужан амалэз тодон-валан понна ужрадэ пыриськизы ини Удмуртиысь дышетӥсьёс, визьнодасьёс но ог 200 пала нылпиос-билингвъёс. Котькуд ортчем 40 занятие озьы ик удмурт лулчеберетлы, удмурт кылъёсты тодонлы но вераськон кылэз азинтолы сӥземын вал.

Удмурт выжыкылъёсысь но дауркылъёсысь геройёсты легомоделирование пыр возьматонъя ӵошатсконэ пыриськозы Кузебай Герд нимо нылпи садысь но Дэри ёрослэн Изгурт школаысьтыз покчи классъёсысь пиналъёс. Соослы висъям дыр куспын героез кылдытоно но удмурт кылын презентация дасяно. Йылпумъяназ вормись команда но пыриськисьёс кузьымъёсын пусъемын луозы, интерактив адӟытон (пердставление) возьматозы.

«Ми понна та ӵектос эскертэт луэ, кудӥз юрттоз адӟыны но чакланы, туала куронъёсты лыдэ басьтыса, кыӵе амалъёс тунсыко луозы анай-атайёслы но нылпиослы удмурт кылэз дышетон понна. Та бордысь ик малпан вордскиз робостудия кылдытыны. Отын нылпиос, анай-атайёс но дышетӥсьёс робототехника, мифъёс но дауркылъёс пыр удмурт кылэз дышетозы. Нош берло асьсэос удмурт робот кылдытозы. Шумпотымон, пыриськисьёс ужрад сярысь ӟеч мылкыдын вазиськизы но выль дышетскон аре ӵектосмес азьланьтыны куро, – вераз ӵектослэн радъясез но авторез Юлия Шахтина.

Ужрадэз Удмуртиысь йӧскалык политикая министерстволэн но Росмолодежь грантлэн юрттэмезъя «АРТЭ» этнокультурной дышетонъя но мерлык кичӧлтонъёсъя центр радъя.