1-2-тӥ пӧсьтолэзе Дэри ёросын, Россиысь тодмо этнографлэн Д.К. Зеленинлэн вордӥськем палаз, фольклоръя «Окно в небо» Калыккуспо 8-тӥ фестиваль радъяськоз.

Ужрадэ пыриськозы фольклор коллективъёс, калык стилья ужась егитъёслэн коллективъёссы, кибашлыос, лыдӟетъюртъёсын ужась ӧнерчиос.

Фестиваль арлы быдэ нимысьтыз темалы сӥземын луэ, ортчытон формаез но вошъяське. 2002-тӥ арын Дэри ёросысь фольклор коллективъёслэн вожвылъяськон фестивальлы кутскон сётӥз. 2009-тӥ арын Фестиваль улсын научно-исследовательской экспедиция ортчиз. Татчы элькунысьтымы 50 егитъёс пыриськизы. 2012-тӥ арын Дэри ёросысь фестиваль финн-угор «Сугуваставунду» (Карелия) фестивален огазеяса ортчытэмын вал. 2014-тӥ арын фестиваль сӥземын вал хоровод шудонъёслы.Санкт-Петербургысь Петр Великий нимо антропология но этнография музеен но Историяя, кылъя но литературая удмурт институтэн ӵош научно-практической конференци радъямын вал. 2016-тӥ арын ужрадлэн темаез «Напевы у печки». Асьсэлэн кырӟанъёсынызы тодматозы Муско но Смоленск улосысь, Ками, Карелия, Чуваш, Марий Эл элькунъёсысь, Эстониысь, Можгаысь но Ижкарысь, Вотка, Кияса, Якшур-Бӧдья, Глаз, Сарапул, Шаркан, Дэри ёросъёсысь коллективъёс. Фестиваль улсын радъяськозы егитъёслы площадка, кибашлыослэн ужъёсынызы адӟытон-вузкарон, фестиваль ортчытонъя лаборатория, этнодискотека.

Фестивальлэн Программаеныз тодматскыны луэ татын.