21-тӥ тулыспалэ Анай кыллэсь калыккуспо нуналзэ пусйыса, Удмурт Элькунысь Кун йӧскалык театрын «Кузебай Герд: рожденный на рубеже веков» нимо XXV Герд лыдӟиськонъёс ортчизы. Ужрад сӥземын Кузебай Гердлэн вордскем дырысеныз 125 ар тырмонлы. Талы луыса, Удмурт шаере Татарстан, Башкортостан, Марий Эл элькунъёсысь, Киров но Пермь улосвылъёсысь куноос вуизы.

Пумисконлэн кутсконаз Кузебай Гердлэн улонэз сярысь видеороликен тодматӥзы. Куанер семьяын вордӥськемез но вакчи дыр ӵоже улэмез ӧз люкетэ быдэс дунне понна тодмо адями луыны. Кузебай Герд – кылбурчи, прозаик но тодосчи гинэ ӧвӧл, со – удмурт литературной кылэз кылдытӥсь но.

Ужрадэ пыриськиськисьёслы ӟечкылан кылъёсын вазиськиз Андрей Ураськин, «Удмурт Кенеш» огазеяськонлэн кивалтӥсез.

«Туннэ конференция сӥземын Кузебай Гердлы – удмурт калыклэн пиезлы, кылбурчилы, драматурглы, фольклористлы, кылысь кылэ берыктӥсьлы, тодосчилы, этнографлы. Ми ваньмы тодӥськомы, кӧня кужымзэ со сётӥз удмурт кылэз но лулчеберетэз азинтон понна. Ваньмыз солэн ужъёсыз сӥземын удмурт калыклы но удмурт кыл ноку медаз быр шуыса», – пусйиз Андрей Ураськин.

Эдуард Петров, Удмурт Элькунысь йӧскалык политикая министр, Герд лыдӟиськонъёслэн кулэлыксы сярысь вераз. «Ми данъяськиськом улосчиенымы, кудӥзлэн быдэс улонэз герӟаськемын удмурт калыклэсь кылзэ, лулчеберетсэ, сям-йылолъёссэ утёнлы. Кузебай Гердлэн со тужгес но бадӟым но пайдаё ужез. Али ми азьын сылэ бадӟым ужпум – солэсь ужзэ азинтыны, егитъёс пӧлы вӧлмытыны», – йылтӥз Эдуар Петров.

Тодослыко ужасьёслэсь но дышетӥсьёслэсь докладъёссэс чебертӥзы Кузебай Гердлэн кылбуръёсыз, повестезъя инсценировка, фольклор кырӟанъёс.

Удмурт йӧскалыкез улӟытон, утён но вӧлмытон понна Можга ёросысь Бадӟым Уча школаысь Лидия Парамоноваез но Нина Байкузиноваез Кузебай Герд нимо премиен данъетазы. Дышетӥсьёс 5 ар ӵоже тыршизы удмурт букварь гожтон бордын. Таӵе уж туж дуно луэ соин но: Россиысь Президентлэн ялэмезъя, таиз ар дышетӥсьлы но визьнодасьлы сӥземын.

Конференция «Трокай» нимо спектаклен йылпумъяськиз. Пусйыны кулэ, Герд лыдӟиськонъёс удмурт кылэз, сям-йылолъёсты, историез, солэсь аспӧртэмлыксэ утёнлы ӧръямын; та ужрад быдэсак тупа «Культура» нацпроектлэн куронъёсызлы, кудӥзлы кутскон сётӥз Россилэн Президентэз Владимир Путин.

Тодэ вайытоно, Кузебай Гердлэн но Ашальчи Окилэн вордскемзы дырысен 125 ар тырмонлы сӥзем ужрадъёс элькунын быдэс ар ӵоже радъяськозы. Пӧртэм тунсыко площадкаос люкалозы бадӟымъёсты но егитъёсты. Шаерамы таиз ар, Элькунысь Тӧролэн Александр Бречаловлэн кичӧлтэмезъя, егитъёслэн арзы шуыса пусйиське.