1-12-тӥ тулыспалэ Удмуртиын «Пельняньлэн дунневыл нуналэз» фестиваль радъяськоз. Туэ со «Ми потӥськом рекордэ» лозунг улын ортчоз.

1-тӥ тулыспалысен Ижкарысь кафеос но ресторанъёс, кудъёсыз пырисько «Зарни пельнянь» премиез басьтон вожвылъяськонэ, радъяны кутскозы пельнянь кутыны дышетӥсь мастер-классъёс. Со сяна фестиваль ӵоже соос калыкез шумпоттозы нимысьтыз пельнянь менюэн.

Фестивальлэн валтӥсь шулдыръяськонэз ортчоз 11-тӥ тулыспалэ Ижкарысь Шор площадьын. Татын калыккуспо рекорд пуктэмын луоз. Юри ӧтем адямиос 11.00-ысен 17.00 часозь лыдъялозы но гожтозы, кӧня пельнянь сиемын луоз фестивальын.

Фестивальлэн спорт площадкаяз комадаосты «Рекорд полоса» ӵошатскон, «Пельняньтон» турнир но мукет вожвылъяськонъёс возьмало. Шудонъёсы пыриськись куноослы сётъялозы купонъёс, кудъёсыныз соос «Быдэс арлы дасям пельнянь» розыгрыше пыриськыны быгатозы.

«Фестивальлэн дырпусэз» площадкаын ёросъёс тодматозы удмурт лулчеберетлэн узырлыкеныз но пӧртэмлыкеныз, озьы ик вералозы ёросъёсын ортчись тунсыко шулдыръяськонъёс но ужрадъёс сярысь.

«Металлург» лулчеберет юрт вӧзы пӧртэм площадкаос интыяськозы. Пичи куноосты возьмалоз «Шудон корка» площадка. Дизайнеръёслэсь ужъёссэс адӟыны но басьтыны луоз «Туала этномир» возьматон-вузкаронын. Пельняньлэн историеныз, соин герӟаськем йылолъёсын «Пельнянь сярысь веранъёс» площадкаын тодматозы К.Герд нимо Йӧскалык музейысь ӧнерчиос. Озьы ик учкыны луоз «Фестивальлэн нимлыко синпелетэз» вожвылъяськонысь тужгес усто ужъёсты.

16.00 часысен Валтӥсь сцена вылын «Зарни пельнянь» премиен пусъён, пӧртэм вожвылъяськонъёсын, ӵошатсконъёсын вормисьёсыты ӟечкылан радъяськоз. Татын ик тодмо луоз «Быдэс арлы дасям пельнянь» розыгрышын вормисьлэн нимыз. Рекордъёсын калыккуспо книгаысь экспертъёс тодматозы лыдпусъёсынызы.

Фестиваль улсын ортчись ужрадъёсын, сое ортчытыны юрттӥсьёсын пыр-почгес тодматскыны луэ ужрадлэн нимлыко вотэс бамаз – https://pelmenfest.ru яке Вконтакте вотэсын https://vk.com/pelmenfest.

Фестивалез радъя Удмурт Элькунысь йӧскалык политикая министерство.