22-тӥ оштолэзе Пичи Пурга ёросын пор лулчеберетъя «Марий Талешке Кече» улосвылкуспо фестиваль ортчоз. Йӧскалык коллективъёс ӵыжы-выжыослы сӥзем пичи спектакльёс, миниатюраос но мукет номеръёс возьматозы.

Ужрад кутскоз Удмуртиысь пор огазеяськонлэн мерлык кенешсылэн заседаниеныз. Отын быдэстэм но вуоно ӵектосъёсты, улосвылъёсысь каръёсын но ёросъёсын огазеяськонъёсты азинтонъя планъёсты пыр-поч эскерозы.

«Улосвыл мерлык огазеяськонмы котькуд ар пор лулчеберетъя фестиваль ортчытэ. Солэн ужпумъёсыз – калыклэсь кылзэ, лулчеберетсэ егитъёс пӧлын вӧлмытон но азинтон, пиналъёслы патриотизмо мылкыд пыӵатон», – пусъе «Национально-культурная автономия марийцев Удмуртской Республики» огазеяськонлэн кивалтӥсез Вернер Ушаков.

Со сяна, та ужрад 2025-тӥ арозь Россиысь кун йӧскалык политикалэн Стратегиез, «Этносоциальное развитие и гармонизация межэтнических отношений» Удмуртиысь программа улсын радъяське. Со быдэсак тупа «Культура» нацпроектлэн куронъёсызлы, кудӥзлы кутскон сётӥз Россилэн Президентэз Владимир Путин.