22–23-тӥ инвожое Удмурт Элькунын «Россиысь финн-угор калыкъёслэн ассоциацизы» (АФУН) огъяросси мерлыко огазеяськонлэн Президиумезлэн кенешонэз радъяськиз. Отчы пыриськись ёзчиос пӧлын – Россиысь пӧртэм улосвылъёсысь улосчиос: Мордовиысь, Комиысь, Марий Элысь, Ханты-Мансийск автоном округысь – Юграысь.

22-тӥ инвожое «Сохранение и развитие нематериального этнокультурного достояния РФ в УР» нимо котырес ӝӧк радъямын вал, ортчиз со Киужъёсъя но калык ӧнеръёсъя элькун центрын. Отын куноос но асьме финн-угор азьветлӥсьёс вераськизы калык лулчеберетэз, кибашлыослэсь быгатонлыкъёссэс утён сярысь, та удысэз азинтонъя федерал законъёсы воштонъёс пыртон сярысь. Ужрадлэн модераторез луиз Россия Федерацилэн сенаторез Пётр Тултаев но Кун Кенешлэн Тӧроезлэн воштӥсез Татьяна Ишматова.

Пыриськисьёслы но лыктэм куноослы ӟечкылан кылъёсын вазиськиз Татьяна Ишматова, элькунысьтымы парламентлэн вице-спикерез. Со пусйиз, Ижкарын таӵе кенешонэз ортчытон бадӟым луонлык сётэ улосвылъёсын, кытын финн-угор калыкъёс уло, этнокультурной узырлыкез утёнъя но азинтонъя, калыкъёслэсь асваланзэс юнматонъя, анай кылэз дышетонъя но вӧлмытонъя кылдэм ужпумъёсты сэрттон-перчтон удысын.

Асьсэлэн ужамзы но азинсконъёссы сярысь веразы Узей-Тукляысь но Дэбес ёросысь киужъёсъя но калык ӧнеръёсъя муниципал юртъёсысь усточиос. Ог-огенызы кенешыса, соос эскеризы элькунысь финн-угор калыкъёслэсь аспӧрмослыксэс утёнъя амалъёсты.

Пумиськонлэн тужгес но яркыт люкетэз вал «Юбка в клетку» дефиле ужрад. Солэн инъетэз – Яр ёросысь Раиса Наговициналэн нимысьтыз дӥськут коллекциез. Озьы ик «Инкуазь» («Природа») коллекциеныз тодматӥз дизайнер Анна Сергеева, «Древо» коллекцизэс Якшур-Бӧдьяысь киужъёсъя но калык ӧнеръёсъя юртысь ужасьёс возьматӥзы.

23-тӥ инвожое куноос эскеризы нылпиосты дышетон удысысь этнокультурной ужпумъёсты, пумиськон ортчиз Пичи Пурга ёросысь Баграш-Бигра гуртын. Отын люкаськемъёсты тодматӥзы дышетон ужъюртъёсын этнокультурной удысэз азинтонъя быдэстэм ужъёсын но азинсконъёсын, нош школа администрациысь ёзчиос пинал муртлэсь этнокультурной аслыксэ (идентичностьсэ) юнматон ужын семьялэсь кулэлыкез сярысь мадизы.

Вераны кулэ, тужгес но трос юанъёс сётэмын вал Ирина Крохиналы, Удмурт Элькунысь дышетонъя но тодосъя министрлэн воштӥсезлы. Ирина Крохина пусйиз, шаерамы анай кылъёсты дышетон валтӥсь, уроке пырисьтэм, факультативной но ватсам программа улсын радъяське шуыса, озьы ик арняяз вить нунал ӵоже дышетсконлэсь ужпумъёссэ валэктӥз.  Солэн верамезъя, анай кылъёсты азинлыко но пайдаё дышетон понна арнялы кык час туж ичи луэ.

Удмурт Элькунысь Правительстволэн юртаз делегацие лыктэмъёсын пумиськиз УЭ-ысь Кивалтэтлэн Тӧроез Ярослав Семенов. Таяз радэ книга поттонъя юанъёс сэрттэмын-пертчемын вал.

Озьы ик чакламын вал СМИ сярысь юанъёсты эскерон, кылсярысь, «Мынам Удмуртие» ТРК-ын экскурсия ортчиз,  удмурт газет-журналъёсын тодматскон радъямын вал. Нош ӝытазе Йӧскалык билиотекаын шаерысьтымы финн-угор калыкъёслэн огазеяськонъёссылэн ёзчиосыныз пумиськонэз радъяз Александр Валов, Печатья но ивор вӧлмытонъя агентстволэн кивалтӥсез. Библиотекаын ик мерлык огазеяськонъёсын пумиськон ортчиз.

Удмурт кыллэн азинскемез вылэ пыкиськыса, этноязыковой политикалэн стратегиеныз тодматӥз УЭ-ысь йӧскалык политикая министр Эдуард Петров. Со пусйиз, Кивалтэт анай кылъёсты утёнъя но азинтонъя, кун кылъёслэсь инлыксэс юнматонъя юанъёслы бадӟым саклык висъя шуыса. Озьы ик йылтӥз на, ивортодэт вӧлмытон йӧскалык ёзэтъёслы юрттэт сётӥське, чеберлыко литература, дышетон, учебной но тодос книгаос печатласько, пӧртэм йӧскалык арбериос вузасько шуыса.

Заседанилэн пумаз Петр Тултаев финн-угор книгаосты Удмурт Элькунысь Йӧскалык библиотекалы кузьмаз. Председательлы, делегатъёслы но лыктэм куноослы тау кылъёсын вазиськиз УЭ-ысь йӧскалык лыдӟертъюртлэн директорез Татьяна Тенсина.