13-тӥ толшоре Калыкъёслэн Эшъяськон юртазы Россиысь калыкъёслэн огъя луэмзылэсь арзэ усьтӥзы йӧскалык политика удысын тыршисьёсты «Содружество» премия пусъёнэн.

Пусйизы куать номинациоысын, кудъёсыз йӧскалык политика удыслэсь ӧръёссэ адӟыто. Данъетамын вал йӧскалык огазеяськонъёслэн кивалтӥсьёссы но ёзчиоссы, дышетӥсьёс, лулчеберет удысын ужась ӧнерчиос но мукет.

Куноосты УЭ-лэн Тӧроезлэн нимысьлэсь Удмурт Элькунысь Тӧролэн но Кивалтэтлэн Администрацизылэн кивалтӥсез Александр Журавлев ӟечкылаз но данъетаз. «Котькуддылы тау шуисько кунмылэн но элькунмылэн азинтоназ бадӟым пытьы кельтэмды понна, тыршемды понна. Кужыммы – тупаса но огазе улонын. Асьмеос ӵош шонер ужпумъёс кутӥськомы ке, ми вормонтэмесь. Удмуртиын 130-лэсь трос калыкъёс тупаса уло, соин ик асьме лэсьтэм ужмес выльысь визьетаны но ужан амалъёсмес мукетъёсызлы но вераны кулэ».

Озьы ик сӥё-дано данъетатэ пыриськизы Кун Кенешлэн кивалтӥсез Владимир Невоструев но солэн воштӥсез Удмурт Элькунысь Кун Кенешысь тодосъя, дышетонъя но граждан мерлык институтэз азинтонлы юрттэт сётонъя ялан ужась ӧрилэн кивалтӥсез Татьяна Ишматова, Удмуртиысь федерал инспектор Алексей Воробьев, элькунлэн вице-премьерез Наталья Тойкина, йӧскалык политикая министр Эдуард Петров, Калыкъёслэн Эшъяськон юртсылэн, УЭ-ысь Мерлык палаталэн кивалтӥсез Юлия Шахтина.

«Содружество» премия йӧскалык политика удысын бадӟым ужрад луэ. Со мыло-кыдо адямиослэн но огазеяськонъёслэн, кин Россиысь калыкъёслэн огъя улэмзы но эшъяськемзы понна тырше, ужъемышсы. Туэ ужрад нимысьтыз висъямон луиз – со Россиысь калыкъёслэн огъя луэмзылэсь арзэ усьтӥз» – вераз Эдуард Петров.

Сӥё-дано ужрадэз «Италмас», «Андан», «Чебеляй» ансамбльёс но Мария Гроздова но Сергей Верняев шулдыртӥзы.