Удмуртиын семьяос понна «Маршрут построен! Удмуртия многонациональная» блог-тур (6+) ортчиз. Со улосвыллэн лулчеберетъя пӧртэмлыкезлы, туризмъя валтӥсь объектъёсын тодматсконлы сӥземын. Ӵектос пыриськисьёслы но соосты уськисьёслы элькунын улӥсь калыкъёслэсь лулчеберетсэс но улон-вылонзэс, ог-огенызы ӟеч кусыпъёссэс возьматыны кулэ. Озьыен, ужрад Россилэн Азьмуртэзлэн Владимир Путинлэн юнматэмезъя «Туризм но куно карон индустрия» йӧскалык ӵектослэн ужпумъёсызлы тупа.

Россиысь калыкъёслэн огъя луэмзылэн араз туэ ужрадэ Ижкарысь, Шаркан, Красногорск, Якшур-Бӧдья ёросъёсысь пӧртэм выжыысь вить мыло-кыдо семьяос пыриськизы. Семьяос ӵектослэн оргкомитетлэн таӵе критерийёсызъя ортчытӥзы: огезлэсь анай-атайлэсь 5 сюрслэсь трос гожтӥськисьёсты кутон, медиа удысын ӵектосъёс, вожвылъяськонъёсы яке мерлыко уже пыриськон опыт.

Блог-тур 28-30-тӥ гудырикошконэ ортчиз. Куинь нунал куспын пыриськисьёс 10 тунсыко интые вуылӥзы: Калыкъёслэн эшъяськон юрт, Калыкъёслэн эшъяськонзылы сӥзем монумент, Удмуртиысь йӧскалык музей, «Лудорвай» музей-заповедник, Космонавтъёслэн паркысьтызы Эшъяськон сад, элькунысь еврей лулчеберетъя мер центр.

Сӥё-дано ужрадын радъясьёс ӵектосэз адӟытӥзы Удмурт Элькунысь йӧскалык политикая министрлэсь ужзэ быдэсъясь Эдуард Петровлы но Удмурт Элькунысь Кун Кенешысь лулчеберетъя, туризмъя но йӧскалык политикая ялан ужась ӧрилэн кивалтӥсез Андрей Ураськинлы.

Архангел Михаиллы сӥзем соборын, Собор мечетьын но армянъёслэн апостольской черказы калыкъёслэн осконъёсынызы тодматскизы.

Семьяос калык шудонъёс, сиён-юонъёс, эктонъёс, архитектура, сям-йылолъёс пыр, кылъёсты тодӥсьёсын удмурт, ӟуч но бигер лулчеберетэз мургес валазы. Озьы ик пыриськисьёс 91 аресъем бигер аби доры куное вуылӥзы.

Блог-турлэн программаяз пӧртэм амалъем ужрадъёс пыртэмын вал: экскурсиос, ӝӧквыл шудонъёсъя чемпионат, мастер-классъёс, йӧскалыккуспо сюан, ӟуч вечёрка, Удмуртиын улӥсь калыкъёс сярысь квест вал.

Ӵектос сярысь вить выпуск дасялозы. Соосты Калыкъёслэн огазеяськонзылэн нуналэзлы сӥзьыса поттозы.

Туспуктэм: Калыкъёслэн Эшъяськон юртсы.