Бадӟым семья ӵошатсконлы (0+) кутскон чакламын Семьялэн, яратонлэн но осконлыклэн нуналэзлы — 8-тӥ пӧсьтолэзьлы. Бызьылон Россиысь калыкъёслэн огъя луэмзылэн арзы но кун йӧскалык политикая Стратегиез 2036-тӥ арозь быдэстон улсын ортчоз.

Солэн одӥгез ужпумез – Россиысь лулпуш-сӥбур но лулчеберетэн но историен герӟаськем дунлыкъёс вылэ пыкиськыса, огъяросси граждан идентичностез юнматон, со «Семья» йӧскалык ӵектосэзлэн ужпумъёсызлы тупа, кудзэ Россилэн Азьмуртэз Владимир Путин юнматӥз. Бызьылон пӧртэм дасяськонэн адямиослы чакламын. Пиналъёслы но кутскисьёслы вакчи дистанциос вань, кузьгес – спортсменъёслы. 0 аресысен 13 аресозь пиналъёс 500 метре бызьыны быгато, 14-17 аресъем нылъёс но пиос – 1 иськеме, 18 аресысен бадӟымъёс – 5 иськеме но 10 иськеме.

Семьялэн валтӥсь стартэз 1 иськем кузьда луоз. Тужгес но умой луоз, бызисьёс вылын йӧскалык тодметсы луоз ке. Финишын вань пыриськисьёсты медальёс возьмалозы.

«Ми нырысьсэ ужрадэз таӵе амалэн ортчытӥськом. Асьмелэн потэ огазеяны ваньзэсты: спортсменъёсын семья командаос бызьылозы, кин ке нырысетӥяз гинэ ай. Та ӵошатсконъёс огазеяськон но эшъяськон югдур сярысь. Та дырлы 500-лэсь трос адями гожтӥськемын ни – бадӟымъёс но нылпиос», – пусйиз Калыкъёслэн Эшъяськон юртсылэн кивалтӥсез Юлия Шахтина.

Спорт ӵошатскон сяна, бызьылонэ пыриськисьёсты но куноосты пӧртэм ужрадъёс возьмалозы: сцена вылын коллективъёслэн шулдыртэмзы, элькунысь йӧскалык-лулчеберетъя огазеяськонъёслэн дасям тунсыко площадкаоссы, творчествоя мастер-классъёс. Та ужрадъёс но ачиз бызьылон С.М. Киров нимо паркын ортчозы.

Стартэ лэземын луозы адямиос, кудъёсыз сьӧразы паспорт, эм справка но страховка кутозы. Та верам ужкагазъёс уг кутӥськы 0-6 аресъемъёслы. Вань бызьылӥсьёслы одно ик кулэ 5-тӥ пӧсьтолэзёзь чӧлскетъя 23.59 часозь гожтӥськыны: https//reg. russiarunning.com/event/Natsionalnyysemeynyyzabeg

Радъясьёс: Калыкъёслэн Эшъяськон юртсы, «Калашников спорт» Удмуртиысь спорт ужрадъёслэн операторез, УЭ-ысь Йӧскалык политикая  Мугор лулчеберетъя но спортъя министерствоос.

Пыр-почгес ВКонтакте мерлыко бамын.

Туспуктэм: «Калашников спорт» Удмуртиысь спорт ужрадъёслэн операторез.