7-тӥ инвожое Кизнер ёросысь Пор Сарамак гуртын нырысетӥез гужем йӧскалык шулдыръяськон ортчиз – «Семык» пор праздник. Туэ улосчиос но куноос шулдыръяськонэз 29-тӥ ползэ пусйизы. Ужрад Атыкай музъемез утисьлэн арез, Быдӟым Атыкай ожын 80 ар Вормонлэн араз но Удмуртилэн 105 ар кунлык басьтэмез тырмон улсын ортчиз.

Йӧскалык шулдыръяськонлэн валтӥсь тодметэз луиз «Эшъяськонлэн зарни сяськаез» («Золотой цветок дружбы»). Со тодмет бадӟым инты басьтэ Кизнер ёросысь поръёслэн лулчеберетазы. Со «сяська» шундылэн, шунытлэн, югытлэн, тупаса улонлэн но шумпотонлэн тодметэз луэ, озьы ик со узырлыкез, азинсконэз, калык сям-йылолъёслэсь чылкытлыксэ возьматэ.

Шулдыръяськонэ вуизы элькунысь, бускель ёросъёсысь делегациос, пор мерлыко огазеяськонъёсысь ёзчиос но куноос.

Люкаськемъёсты УЭ-ысь йӧскалык политикая министр Эдуард Петров ӟечкылаз.

2 сюрслэсь трос адями Семыке вуиз. Котькудӥз узыр пор лулчеберетэн, сиён-юонэн тодматскиз. Элькунысьтымы улӥсьёслэн та ужрадэ пыриськемзы лулчеберетэз утёнлы но азинтонлы юрттэ, со «Семья» йӧскалык ӵектослэн азьмугъёсызлы тупа.

Вуоно арын Семык Каракулино ёросын ортчоз.