10-тӥ инвожое Пичи Пурга ёросысь Иж-Бобья гуртын поръёслэн «Семык» шулдыръяськонзы ортчиз. Семык – пор калыклэн дырпусаз валтӥсь шулдыръяськонэз луэ, со гужем праздникъёслы кутскон сётэ.

Ужрадэ Удмуртилэн каръёсысьтыз но ёросъёсысьтыз, Киров улосысь, Марий Элысь но Татарстанысь коллективъёс вуизы.

Гуртын улӥсьёсыз но лыктэм куноосыз ӟечкылаз Удмурт Элькунысь йӧскалык политикая министрлэн нырысетӥ воштӥсез Павел Орлов, «Пичи Пурга ёрос» муниципал кылдытэтлэн Тӧроез Сергей Юрин, Удмурт Элькунысь поръёслэн йӧскалык-лулчеберет автономизылэн кивалтӥсез Анатолий Радыгин но Удмурт Элькунысь Кун Кенешлэн тодосъя, дышетонъя, лулчеберетъя, йӧскалык но егитъёсын ужан политикая но спортъя ялан ужась ӧриезлэн тӧроезлэн воштӥсез Пётр Басов.

«Семык» шулдыръяськонэз элькунамы ортчытон пор калыклэсь сям-йылолъёссэ утьыны, Удмуртиын улӥсь мукет выжы калыкъёслы куспазы тупаса улыны юрттэ», – пусйиз Удмурт Элькунысь йӧскалык политикая министрлэн нырысетӥ воштӥсез Павел Орлов.

Праздникез сӥё-дано усьтэм бере, калыкез творческой коллективъёс шулдыртӥзы. Со вакытэ ик мукет площадкаос но ужазы. Кылсярысь, «Уста еҥгай» площадкаын выль кенъёс возьматӥзы корка котырын ужана-пӧраны быгатэмзэс, киужъёсынызы паймытӥзы. Воргоронъёс кужымзэс мертазы «Марий Патыр» вожвылъяськонын. Нош пичи куноос шудӥзы-серектӥзы «Йоча модыш вер» азбарын.

Куноос понна озьы ик ужазы пӧртэм пумо мастер-классъёс.