2-тӥ южтолэзе 2014-тӥ аре Калыкъёслэн эшъяськон юртазы ортчоз Т.Г. Шевченколэсь произведениоссэ лыдӟонлы сӥзем II Элькун вожвылъяськон.

Вожвылъяськонлэн валтӥсь меретъёсыз (цельёсыз): Тарас Шевченколэн, быдӟым украин поэтлэн, творчествоеныз тодматон, калык пӧлы вӧлмытон, калыкъёслэсь кусыпъёссэс юнматон.

Вожвылъяськонэз радъяло: Удмурт Элькунысь йӧскалык политикая министерство, Калыкъёслэн Эшъяськон юртсы, Удмурт Элькунысь украин лулчеберетъя «Громада» мерлыко огазеяськон, Россиысь украин кылъя но лулчеберетъя арнянунал школаослэн ассоциацизы.

Вожвылъяськонэ пыриськыны быгато Удмурт Элькунысь ныли садъёсысь пиналъёс, шоръёзо школаосысь дышетскисьёс, шоръёзо но вылӥ дышетскон ужъюртъёсысь студентъёс. Ужрадэ пыриськисьёслэн арлыдзы – 5- 24 арес.

Вожвылъяськонэ пыриськисьёс арлыдзыя люкемын луозы 4 группаослы: 1) ныли садэ ветлӥсь пиналъёс но 1-4-тӥ классын дышетскисьёс; 2) 5-8-тӥ классъёсын дышетскисьёс; 3) 9-11-тӥ классъёсын дышетскисьёс; 4) шоръёзо но вылӥ дышетон ужъюртъёсысь студентъёс.

Вожвылъяськон ортчоз 2 номинация: 1) Т.Г. Шевченколэсь произведениоссэ украин кылын лыдӟон; 2) Т.Г. Шевченколэсь мукет кылъёсы берытэм произведениоссэ лыдӟон.

Вожвылъяськонэ пыриськись Т.Г. Шевченколэсь кылбурзэ (люкетсэ) яке прозаен гожтэм произведениысьтыз люкетсэ украин яке мукет кылын учкытэк вераны кулэ. Котькуд лыдӟисьлы 5 минут сётӥське. Азьвыл вожвылъяськонын лыдӟем произведениен ик вожвылъяськонэ пыриськыны уг яра.

Вожвылъяськонын вормисе потэмъёс но котькуд лыдӟись пусъемын луозы кузьымъёсын но данъянъёсын. Дышетӥсьёс – таукаронъёсын.

Вожвылъяськонэ пыриськон понна заявкаос келялэ 25-тӥ тулыспалозь. Татын одно ик пусъемын луыны кулэ дышетскисьлэн ным-тулыз, классэз, сое дасясь дышетӥсьлэн нимтулыз, дышетскон ужъюртлэн нимыз, произведенилэн нимыз но кыӵе кылын гожтэмез, телефон номер но электрон почталэн адресэз.

Заявкаосты келяно: gromadaur@mail.ru элетрон адресэ. Темаяз одно ик гожтоно «Т.Г. Шевченко вожвылъяськонэ заявка» шуыса.

Ватсаса тодэт басьтыны луоз таӵе телефонъя: 8-3412-78-48-27 (Шевчук Вероника Станиславовна).