15-16-тӥ коньывуонэ Калыкъёслэн Эшъяськон юртазы «Мир в диалоге» (18+) муниципал кылдытэтъёслы сӥзем улосвылкуспо форум ортчоз. Ужрадлэн азьмугез – ёросъёслэн мунициапал кылдытэтъёсысьтызы огмуртъёслэсь тодон-валанлыксэс (компетентностьсэс) будэтон, кудӥз герӟаськемын этносъёс вискысь кусыпъёсты умоятонэн. Форумлэн мукет ужпумез – субъектъёс вискын кун йӧскалык политикаез улонэ пыӵатон кусыпъёсты муромытон.

Кенешон площадкаослэн радъясьёсыз пӧлын йӧскалык политика удысысь федерал но улосвыл ӧнерчиос луозы. Пыриськисьёс кенешозы егитъёсты патриотизм мылкыдэн будэтон, иворъёсты вӧлмытон ёзэсъёслэн но вотэсбамъёслэн йӧскалык политика удысын интызы, кунсьӧрысь муртъёслэн адаптацизы, казачествоез но этноволонтёрство удысэз азинтон сярысь.

Форумлэн программаез куать площадкаослэсь радъямын луоз:

— «Патриотическое воспитание молодежи на основе традиционных духовно-нравственных ценностей» нимо котырес ӝӧк;

— «Роль СМИ и социальных медиа в гармонизации межнациональных отношений» нимо кенешон;

— «Традиционные знания и устойчивое развитие территорий коренных малочисленных народов России» нимо кенешон;

— «Развитие казачества: вклад в гармонизацию межнациональных отношений» нимо котырес ӝӧк;

— «Современное измерение миграции. Механизмы социокультурной адаптации иностранных граждан» нимо семинар;

— «Региональный корпус этноволонтёров Удмуртии: опыт и перспективы развития в Удмуртии» нимо ӵектос сессия.

Форумын йӧскалык кусыпъёсъя удысысь тужгес но усто муниципал практикаосъя Элькун вожвылъяськонлэн данъетанэз ортчоз. Озьы ик этнокультура ӧръя ӵектосъёсты адӟытозы, этномаркет но туспуктэмъёсын адӟытон радъямын луоз. Люкаськемъёс Удмуртиысь калыкъёслэн Музей-лабораториязы ветлыны быгатозы.

Ужрадэ пыриськозы Удмурт Элькунысь но мукет улосъёсысь коммерциен герӟаськымтэ огазеяськонъёсысь огмуртъёс, ӵектосъёслэн авторъёссы, дышетон, лулчеберет, егитъёсын ужан политикая удысъёсысь ӧнерчиос.

Регистрация 5-тӥ коньывуонозь https://мирвдиалоге.рф/

Форумлэн радъясьёсыз: УЭ-ысь Йӧскалык политикая министерство но Калыкъёслэн Эшъяськон юртсы.