21-тӥ южтолэзе Калыкъёслэн Эшъяськон юртазы «Удмуртиын улӥсь калыкъёслэн эктонъёссы» нимо ӵектос радъяськиз.

Калыкъёслэн Эшъяськон юртысьтызы ӧнерчиос хореографъёсты но хореографи коллективъёслэсь кивалтӥсьёссэс чувашъёслэн, поръёслэн но кряшенъёслэн калык эктонъёсынызы тодматӥзы.

Ужрадлэн нимысьтыз куноез – Геннадий Михайлович Макаров – искусствоведения кандидат, Татарстан Республикысь Тодос Академилэн Ш.Марджани нимо история институтлэн ӧнерчиез. Тодосчи люкаськем калыклы вераз кряшенъёс сярысь, сосолэн лулчеберетсы сярысь. 2010-тӥ арын ортчем лыдъян-чотанъя Россиын 35 сюрс кряшенъёс уло. Тросэз соос пӧлысь уло Татарстанын. Озьы ик соос уло Башкортостанын но Удмуртиын.

Уно аръёс ӵоже мукет калыкъёсын артэ улыса, кряшенъёс ыштыны кутскизы калык йылолъёссэс. Озьы ке калык кырӟанъёссэс но эктонъёссэс утьыны быгатӥзы.

Туннэ нуналэ Татарстанын ог 60 кряшен коллективъёс, кудъёсыз мылысь-кыдысь пырисько портэм фестивальёсы но вожвылъяськонъёсы. Та калыклэн лулчеберетэз 20-30 арскын медаз ышы, медаз вуны шуыса, Геннадий Михайлович ӵектэ устолыкъёсъя школаосын но колледжъёсын кряшенъёслэсь кырӟанъёссэс но эктонъёссэс дышетыны, эскерыны. Озьы ик мукет ичи лыдъем калыкъёслэсь лулчеберетсэс утён понна таӵе луонлыкез кутоно.

Ужрадлэн кыкетӥ люкетаз мастер-классъес ортчизы. Елена Сергеевна Казанцева, Устолыкъёсъя 8-тӥ номеро школаысь дышетӥсь, вера таӵе ужрадэз кемалась возьмаз шуыса. Таӵе ужрадъёс Ижкарын шер пумисько, нош калык эктонъёслы дышетӥсь дискъёсты шедьтыны шуг. Сои ник таӵе ужрадэ шедьыны – со бадӟым шуд.

Кряшенъёслэсь эктонъёссэс дышетӥзы Казаньысь «Бермянчек» кун фольклор ансамбльысь артистъёс. Пор но чуваш эктонъёсты возьматӥзы «Келшымаш» коллективлэн хореографъёсыз.