«Бадӟым этнографической диктант» (6+) арлы быдэ ортчись укмысэтӥез калыккуспо акция «Калыкъёсмы трос, нош кунмы одӥг!» лозунген радъямын луоз. Со Калыкъёслэн огазеяськон нуналзылы но Удмуртилэн кунлык басьтэм нуналэзлы сӥземын.

Акция тодматэ асьмеды Россиысь пӧртэм калыкъёслэн лулчеберетэнызы, этнокультура сярысь тодон-валанъёсмес дунъя, озьы ик пӧртэм арлыдзыя, дышетскемзыя, пӧртэм осконзыя но кунмуртлыксыя трос миллион адямиосты огазея. Туэ диктантэз 1-8-тӥ шуркынмонэ гожтыны луоз площадкаосын но онлайн амалэн. Площадкаос вотэсбамын пуктэмын: https://minnac.ru/gde-napisat-bolshoj-etnograficheskij-diktant-v-udmurtii/

Валтӥсь площадка – Удмурт Элькунлэн Кун Кенешез, кудӥз вуоно арын 30 арзэ пусъёз. Кутсконэз 11:00.

Диктант 30 юанлэсь кылдытэмын, тест амалэн ортче. Оглом 100 балл люканы луэ. Ужез быдэстыны 45 минут сётӥське. Пыриськисьёслы йылпумъянъёсын сертификатъёс соку ик дасямын луозы.

Юанъёсты кылдытонэ мылкыд карисьёс пыриськизы, тазьы туэ гинэ нырысьсэ луиз. Тужгес но тунсыкоосыз пыртэмын быдэс Россия понна дасям огкадесь юанъёсы пӧлы, со понна авторъёссы вунэтонтэм кузьымъёс басьтозы, отын югдытӥсь акцилэн тодметъёсыныз пусъемын.

Онлайн амалэн тестэз Бадӟым этнографической диктантлэн https://miretno.ru/ официальной вотэсбамаз 1-8-тӥ шуркынмонэ ортчыны луоз.

Эшшо огпол пусъём, ӵектос Удмуртиын кылдытэмын – «Ассамблея народов Удмуртии» мерлыко огазеяськон но УЭ-ысь Йӧскалык политикая министерство кичӧлтэм улсын. Собере акция, Россие сяна, кунсьӧре но паськыт вӧлмиз. Йӧскалык ужъёсъя Федерал агенство ӵектослы бадӟым юрттэт сётӥз, со ик акцилэн валтӥсь радъясез луэ.