28-тӥ оштолэзе ортчиз II Йӧскалыккуспо волейболъя ӵошатскон йӧскалык-лулчеберетъя огазеяськонъёс куспын УЭ-ысь йӧскалык политикая министерстволэн кубокез понна. Туэ ужъюртлы 30 ар тырме. 11 команда шудӥз, соос пӧлын вал ӟучъёс, удмуртъёс, бигеръёс, белорусъёс, озьы ик Индиысь но Таджикистанысь студентъёс.

Удмуртиысь Тӧролэн но Кивалтэтлэн Администрацизылэн кивалтӥсез Александр Журавлев, йӧскалык политикая министр Эдуард Петров, Удмурт кун аграрной университетлэн ректорез Андрей Брацихин но «Урарту» армян мерлык огазеяськонлэн кивалтӥсез Мнацакан Аракелян ӟечкылазы ӵошатсконэ пыриськисьёсты.
«Удмурт кун аграрной университет кыкетӥ ползэ йӧскалыккуспо ӵошатсконэз радъя. Оскисько, та ужрад ӟеч йылоллы пӧрмоз, спортэн эшъяськеммес азинтомы. «Арарат» но «Урарту» армян огазеяськонъёслы тау карисько кичӧлтэмзы понна. Кызьы шуэ Президентмы, асьмелэн трос йӧскалыкмы – кунмылэн азьбурез но кужымез. Зэмзэ но, со озьы ик вань. Спорт ӵошатсконъёсын гинэ асьмеос вожвылчиос ог-огмылы быгатӥськом луыны», – вераз Александр Журавлев.

Озьы ик со ӵошатскисьёсты матысь йӧскалык шулдыръяськонъёсы ӧтиз:

– 8-тӥ инвожое – поръёслэн Семык (0+) шулдыръяськонзы Грак ёросын;
– 15-тӥ инвожое – удмуртъёслэн Гербер (0+) шулдыръяськонзы Шаркан ёросын;
– 23-тӥ инвожое – бигеръёслэн Сабантуй (0+) шулдыръяськонзы Глазкарын;
– пӧсьтолэзе – армянъёслэн Вардавар (0+) шулдыръяськонзы.

Кема кыстӥськись шудонлэн йылпумъянъёсыз:

1-тӥ инты – УЭ-ысь Кивалтэтлэн командаез;
2-тӥ инты – «Калыкъёслэн Эшъяськон юртсы» команда;
3-тӥ инты – «КУАРА» удмурт егитъёслэн мер огазеяськонзылэн командаез.